SUPERBALITA DAVAO

Editoryal: Mag-ampo ug manghinaut



MEDYO makahupay sa kabalaka ang pahayag sa atong mga opisyal sa Department of Health (DOH) nga nagseguro nga taliwala niining gumonhap nga mikuyanap sa nasud sa China ug pipila ka mga nasud sa langyaw nga kanasuran, wa pay natala nga bisan usa ka kaso dinhi.

Hinuon, dunay pipila ka indibiduwal nga gidudahan nga nataptan sa coronavirus, apan negatibo ang gihimong paghiling sa mga doktor samtang ang uban gipailawom pa og makuting pagsubay sa mga eksperto sa panglawas.

Ang sakit nga coronavirus nikalas na og kapin 40 ka kinabuhi sa nasud China ug duna pay liboan ka mga kaso nga gitutukan sab sa kagamhanan sa maong nasud, inabagan sa uban pang mga nagpakabana nga kanasuran o grupo sa mga eksperto sa panglawas.

Gipasalig sab sa DoH nga padayon nilang gihimo ang ilang tahas sa pagmonitor pinaagi sa paggamit og mga therma scanners ug uban pang sopistikado nga gamit sa mga tugpahanan sa eroplano aron nga maseguro nga way makasulod nga indibiduwal nga dunay inpeksiyon niining maong sakit.

Gihimo nila ang tanan aron nga pabilin kitang luwas sa maong sakit nga nikuyanap na sab sa pipila ka mga silingang nasud sa China.

Gawas niini, duna pay daghang mga “measures” ang gilatag departamento sa panglawas aron nga mapugngan ang posibleng pagsulod niini dinhi sa nasud apan gipasalig nga andam sa kanunay kon ugaling makatala kita og mga indibiduwal nga duna niini nga sakit.

Bisan ang Southern Philippines Medical Center (SPMC), pinakadako nga ospital dinhi sa Mindanao, nagmugna og pamaagi aron nga tugbangan ang maong sakit kon ugaling mosulod man sa siyudad.

Mismong si SPMC Chief of Clinics and Health Emergency Management Bureau (HEMB) coordinator Dr. Ricardo Audan nagsulti nga ang ospital andam kanunay sa posibleng mahitabo.

Gipasalig niya nga tanang personahe sa SPMC maayo ang pagkabansay aron sa pagtubag niining global pandemic.

Mag-ampo ug manghinaut kita nga unta ilikay ang dakbayan ug ang nasud niining makamatay nga sakit nga wa pa masayri ang tinubdan sa kagaw nga nihugop na didto sa nasud China nga padayong gisusi ug gitagad ning panahona aron nga mapakgang.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph