Pagpanamilit sa legasiya

CALIFORNIA. Usa ka fan mihatag respeto sa mural ni Kobe Bryant sa usa ka dalan sa Los Angeles human sa kamatayon sa basketbolisya. (AP)
CALIFORNIA. Usa ka fan mihatag respeto sa mural ni Kobe Bryant sa usa ka dalan sa Los Angeles human sa kamatayon sa basketbolisya. (AP)

USA ka subo nga balita ang misugat sa mga basketball fans, Lunes sa buntag (oras sa Pilipinas).

Kini tungod sa makakurat nga taho, ang kalit nga kamatayon sa basketball legend, Kobe Bryant.

Si Bryant mihatag og dakong inspirasyon sa mga basketball players sud sa duha ka dekada niyang karera sa Los Angeles Lakers.

Sukad siya miretiro, gihingusgan sa magduduwa ang pagpanudlo og basketball sa mas batan-ong henerasyon.

Ang 18-time All-Star nga milabni og lima ka kampeyonato, giilang usa sa labing ngilngig nga basketball players sa iyang henerasyon, namatay human nahagsa ang gisakyang helicopter, Dominggo.

Siya 41 anyos.

Ang pagkahagsa nahitabo sa bukirong bahin sa Calabasas, California, mga 30 milyas sa amihang-kasadpan sa Los Angeles.

Ang crash site, mga 20 milyas lang ang gilay-on gikan sa Mamba Sports Academy, nga maoy basketball training complex ni Bryant sa Thousand Oaks, California.

Suma pa usa ka girls basketball tournament ang nakaiskedyul sa maong adlaw sa maong pasilidad.

Apil sa namatay ang 13-anyos nga anak sa basketbolista nga si Gianna o Gigi nga maoy ginabansay niya og maayo sa pag-basketball.

Dugang sa report, siyam ang tanang sakay sa helicopter, apan way gipagawas nga ngalan ang otoridad.

Suma pa nga sagad nagagamit gyud og helicopter si Bryant aron makalikay sa trapik sa California.

Panahon nga may praktis magsakay siya niini, hangtud sa miretiro siya niadtong 2016.

Nabiyaan ni Bryant ang asawang si Vanessa ug laing tulo nila ka anak.

Detalye sa pagkahagsa

Suma pa ni Los Angeles County Sheriff Alex Villanueva nga daut ang panahon dihang nahagsa ang helicopter.

Suma pa, gabunon ang dapit asa nahagsa ang sakayan asa sakay ang NBA star ug laing walo ka tawo.

Dugang pa nga nagkatag sa area nga sama kadako sa football field ang debris sa nahagsa nga helicopter.

Giangkon sab ni county medical examiner, Dr. Jonathan Lucas, nga ang recovery sa patay’ng lawas molanat pa og pila ka adlaw, diin paningkamutan nilang mailhan ang mga biktima sa labing madali nga panahon.

Nakurat

Ang kamatayon sa NBA legend gikakurat sa kalibutan.

Mga fans, suot ang jerseys ni Bryant midagsa gawas sa Staples Center samtang emosyonal nga nagsud-ong sa video boards nga may nawong sa basketbolista.

Una sab nagsugod ang duwa tali San Antonio Spurs ug Toronto Raptors migahin sila og 24 segundos nga kahilum isip pahinungog sa numero 24 nga jersey nga suot ni Bryant.

Misunod sab ang ubang tims sa paggahin og oras sa kahilum, uban sa magduduwa emosyonal ug mihilak sa wa damhang balita.

Kalampusan

Usa si Bryant sa labing inilang magduduwa sa tim, diin giatubang niini ang 16-time NBA champion Lakers nga franchise. Nahimo siyang MVP sa 2008 ug two-time NBA scoring champion.

Kapila ka beses siyang milangkat og kampeyonato sa NBA uban ang lain pang inilang magduduwa sama nila Shaquille O’Neal, Pau Gasol ug uban pa.

Si Bryant nga two-time Olympic gold medalist uban ang US team, miretiro siya niadtong 2016. Disyembre 2017 miretiro sab ng numero sa jersey nga iyang suot, ang No. 8 ug No. 24.

Karera

Nagsugod ang basketball career niya dihang high school pa siya, 1996.

Gikuha sa Lakers ang 17-anyos kaniadto nga si Bryant, human siya gi-draft sa Charlotte, ug sukad niadto usa na siya sa giila ug gikahinamang magduduwa uban si O’Neal u misunod pa ang ubang kasikas sa iyang abilidad sa pagdribol.

Kontrobersiya

Tuig 2003, gipasanginlan si Bryant nga giatake ang usa ka 19-anyos nga empleyado sa Colorado resort, apan nabasura ang kaso. Ang babaye giingong mipasaka og civil suit apan na-settle ra sab kini sa korte. (Uban ang report sa AP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph