DIGOS CITY -- Padayong nakasinati og mga hinay apan sagunsong linog ang pipila ka mga lungsod sa Davao del Sur ug silingang Davao Occidental, sukad Dominggo sa tungang gabii, Enero 26.
Apil nga nakasinati ang mga dapit sa Davao del Sur nga naigo sa magnitude 6.9 nga linog niadtong Oktubre ug Disyembre 2019.
Sa datus sa Philippine Institute of Volcanology and Seismology (Phivolcs), natala ang unang magnitude 2.5 nga linog, mga upat ka kilometro amihang-kasadpan sa Sulop alas 12:10 sa kaadlawon ug adunay usa ka kilometrong gilawmon.
Nasundan kini sa 2.4 magnitude banda alas 2:01 sa kaadlawon, mga unom ka kilometros sa maong lugar ug adunay gilawmon nga 27 kilometros.
Samtang, usa ka magnitude 1.6 sab ang natala sa Phivolcs, mga tulo ka kilometros sa habagatang-sidlakan sa Magsaysay ug anaa sa usa ka kilometro ang gilawmon, banda alas 12:21 sa tungang gabii.
Nasundan kini sa magnitude 2.2 banda alas 9:44 sa buntag, diin ang epicenter natala mga 16 kilometros sa habagatang-sidlakan sa Magsaysay.
Segun sa Phivolcs natala sab ang 2.2 magnitude nga linog mga 11 kilometros sa amihang-kasadpan sa silingang lungsod sa Padada, banda alas 2:53 sa kaadlawon ug adunay gilawmon nga 18 kilometros.
Samtang sa Davao Occidental, kambal nga magnitude 2.4 nga linog ang mitay-og sa lungsod sa Don Marcelino.
Natala ang unang linog banda alas 3:09 sa kaadlawon, diin ang epicenter anaa sa mga 52 kilometros sa amihang-kasadpan sa lugar ug anaa sa 4 kilometro ang gilawmon ug ikaduha banda alas 4:20 sa kaadlawon, mga 67 kilometros sa habagatang-sidlakan sa lugar ug mga 25-kilometros ang gilawmon.
Banda alas 10:47 sa buntag, gitay-og sab sa magnitude 4.1 nga linog ang silingang lungsod sa Sarangani.
Sumala sa Phivolcs, natala ang epicenter mga 265 kilometros sa habagatang-sidlakan sa lugar ug anaa sa 300 kilometros ang gilawmon.
Hangtud kagahapon Lunes, Enero 27, natala sa Phivolcs ang sagunsong hinay nga linog sa probinsiya.
Banda alas 12:33 sa kaadlawon, usa ka 3.2 magnitude ang natala sa Jose Abad Santos ug laing 2.4 sab ang nasinati sa Malita.
Hinuon pulos tectonic in origin ang mga linog ug way tsunami warnings ug aftershocks ang gideklara sa Phivolcs. (Orlando B. Dinoy)