NAHIMONG masulob-on ang buntag alang sa pamilya sa usa ka senior citizen human nga on the spot kining namatay sa dihang naligsan ug nalatayan og ligid sa 18-wheeler truck kagahapon sa Sasa, Davao City.
Nagkanayon si Sasa Police Station commander Major Reuben Libera nga base sa nakuha nilang impormasyon bahin sa aksidente sa Kilometer 12, Sasa Lunes, Enero 27, nga ang biktima giilang si Pacita Y. Montana, 65, biyuda, ug molupyo sa Immaculada sa maong barangay.
Sa pikas bahin, ang drayber sa truck giilang si Gomersendo L. Torreon, 59, molupyo sa Poblacion II, Cotabato City.
Atol sa dagan sa imbestigasyon, nasayran nga usa ka freightliner truck nga naglabigar sa Davao-Agusan National Highway padulong sa amihanang direksiyon, nikalit pagliko pa-wala sa maong dapit apan naligsan ang biktima sa samang higayon.
Ang biktima, kinsa nitabok lang sa dalan, gideklarang patay gilayon sa nagresponding mga personahe sa Central 911.
Sa post sa usa ka Darylle, matud niya nga nasakitan sila og maayo human masayri ang hitabo sa pagkamatay sa iyang apohan ug di pa siya makatuo patay na kini.
Dugang pa niya nga malipayon pa sila niadtong Dominggo sa wala pa mahitabo ang aksidente ug wa gyuy mga sinyales nga mao na kadto ang ilang katapusang “bonding”.
“Sakit man sa among buot nga nawala na among lola dili mang god nato mabantayan atong kamatayon only God ra nakabalo. Siguro gikuha siya ni God kay gimingaw na si lolo sa iyaha. La/Lo ma-miss ka namo. Last day na diay pagkita nato gahapon La,” matud sa iyang post.
Ang drayber naa na sa kustodiya sa Sasa Police Station aron nga pasakaan og kasong “reckless imprudence resulting in homicide”.