DAVAO DE ORO -- Nagpasalamat og dako nga nahimong kabahin ang katawhan sa lokal nga panggamhanan si Lieutenant Colonel Sonny Gonzales, commanding officer sa 71st Infantry Battalion (IB), Philippine Army sa malampusong pagdakop sa giingong political instructor ug organizer sa New People’s Army (NPA) sa Barangay Anibongan, Maco alas 9 sa gabii atol sa Chinese New Year.
Nadakpan ang nailhan sa pangalang Edna Remegio Tan alyas Madame, 48, kon diin narekober gikan kaniya ang mga gamit pang-giyera, ingon man mga subersibong dokumento.
Subay sa taho, mihimo og pagresponde ang tropa sa 71st IB uban sa mga personahe sa Maco Municipal Police Station human nadawat ang impormasyon gikan sa mga nagpakabanang lungsuranon nga giingong lima ka mga rebeldeng NPA nasiplatan sa Purok 5 sa Barangay Anibongan.
Matud pa nga gipabuthan sa mga rebelde ang nagpadung nga mga sundalo hinungdan nga napugos pagbalos ang tropa sa gobyerno hinungdan nga nadominar sa mga sundalo ang lugar hinungdan nga mga rebelde nagkatibulag og panagan padung sa nagkalain-lain direksiyon.
Gipanggukod sa mga sundalo ang mga rebelde hangtud nga nakorner si alyas Madame ug nadakpan.
Narekober gikan kaniya ang kalibre .38 nga dunay duha ka mga buhing bala ug kolor itom nga back pack nga dunay sulod nga usa ka improvised explosive device (IED), subersibong mga dokumento, personal nga mga gamit, ug tulo ka mga basiyo sa bala sa kalibre .45 nga pistola.
Si Tan giila nga political instructor ug organizer sa sub-section sa Committee Cluster C4 sa Weakened Guerilla Front 2 (WGF 2) sa NPA.
Sa paghinabi, giangkon ni Tan nga siya ang nagpasiugda og underground mass organization ug siya usab ang nagpasiugda sa Malisya ng Bayan ug nagsilbing instructor sa CPP-NPA Discipline and Doctrine sama sa Pambansang Demokratikong Pampartido (Padera) sa napulo ka mga barangay sa Maco sukad niadtong 2012.
Samtang giangkon sab niya nga mga nagpasiugda sa rally sa mga siyudad sa Tagum ug Davao kon diin nag-awhag nga “Pahawaon ang mga sundalo sa ComVal” ug “Undangan ang pagpatay sa mga nilupigang sibilyan” nga nahitabo niadtong 2013 ug “Ipagawas ang gipangkurakot nga NFA nga Bugas” niadtong 2015.
Sa pikas bahin, gikompirma sa Maco MPS nga ang nadakpang si alyas Madame adunay nakaung-ong nga warrant of arrest tungod sa kasong Frustrated Murder nga giisyu niadtong Oktubre 10, 2018 sa Regional Trial Court Branch 57, Mabini.
Gipasalig ni Lieutenant Colonel Gonzales nga padayon ang ilang pagsuporta sa sa Task Force Elcac ug sa community support program padung ngadto sa mga ka-barangayan sa matag lungsod.
Dugang pa nga ang 71st IB way plano nga hatagan pa’g kahigayunan nga subling makabangon ang kawsa sa walhong grupo nga inanay nang nahugno apan padayon ang mainitong pagdawat ug paggiya ngadto sa mga rebelde kinsa boluntaryong motahan sa ilang kaugalingon ug andam nga mobalik sa sabakan sa balaod ug manginabuhi nga normal sa patag. (Dexter T. Visitacion)