ANAD na ang mga pulis sa Presinto Uno nga magyagayaga ug magbugalbugal kang bisan kinsa nga mosulod sa ilang buhatan ilabi na nga may mga tsiks. Manggula ang ilang kabigatlon. Mangayabag sila sa ilang kauwagon lakip na ang hamtong ug tiguwang nga mga pulis. Naanad sila niini kay nagsalig sila nga may mga tsapa ug mga pistola sila. Walay makabadlong kanila. Kinsay mobadlong kanila? Ang ilang hepe sa kapulisan may lainlaing mga babaye nga gikapuyo. Ug kinsay mobutyag sa sekreto nilang mga binuhatan?
“Mga bastos kamo!” misinggaak ang usa ka minyo ug mabdos nga babaye. “Moreklamo tang may nagbinastos kanako nga mga estambay sa dalan, inyo hinuon kong gikataw-an kay wala koy testigo bisan usa nga makabutyag sa nagbinastos kanako! Ug karon inyo kong binastosan sa pagsulti nga wala man kaha kulkoga ang akong imbornal ug giingon lang nga humot ang akong imbornal! Ug inyo pa akong pangutan-on kon makasimhot ba kamo sa akong imbornal!”
Ang mga pulis mikagiki hinuon sa pagpangatawa ug miingon, “Saba diha, Inday beautiful! Komplemento nang daygon ang imong imbornal. Anugon nang dili masimhot sa kadaghanan!”
Labi pang miulbo sa kasuko ang mabdos nga babaye. “Mga mananap kamo! Mga buang kamo!”
“Hoy, Inday beautiful! Mas maayo pang mobiya ka na lang kay kasuhan ka unya namog criminal case. Ginganlan mo na kamig mga buang! Unsa man? Ibalhog ka na namo sa prisuhan?”
Sa kahadlok, misibat ang mabdos nga babaye ug hilabihan ang pagpangatawa sa mga pulis. Gikahimuot nila ang pagbinastos sa mga tawo nga modangop sa kapulisan. Kon may moungol nga modangop kanila, ingnon nila nga, “Gikawat ang imong mga limos sa mga estambay? Sumbaga sila! Kulataha! Pagkuhag sundang ug putla ang ilang mga kamot nga kawatan! Di ba, mangapungkol usab sila!”
Isog ug mga hawod sila kay may mga tsapa, may mga pistola sila ug sinuhulan og binuwan sa gobyerno. Dagko silag suweldo ug way makapugong sa ilang kapamahitas-on, kabanyaga ug kasalbahis. Nalimot sila sa ilang balaanong katungdanan.
Paglabay sa panahon, wala nila damha nga may nagsunod-sunod nga pagpangluba sa kauban nilang mga pulis sa Presinto Uno. Ingon sa dili sila makatuo nga giputlan kini sa ilang mga dila ug gituslok ang mga mata niini. Nanlimbawot ang ilang mga balhibo sa kahadlok ug kalisang.
Gimandoan sila sa ilang hepe. “Men, solve this case within one week.” Apan wala pay semana, napatik sa mga mantalaan ug nasibya sa mga radyo ug telebisyon ang usa ka dakong balita nga nasakpan ang hepe sa kapulisan sa iyang asawa nga may gikapuyong babaye. Sa iyang pagkatulog sa ilang panimalay, gigaid siya sa iyang misis ug giputlan sa ubos niyang hinagiban, ang iyang kinatawo. Nauplok siya sa tumang kaguol. Ug gilayasan pa sa iyang asawa. (Katapusan)