AKONG gibantayan karon ang pagresponde sa duha ka mga mayor: si Mayor Edgar Labella sa Sugbo ug Mayor Isko Moreno.
Bunga kini sa krisis sa novel coronavirus nga naghasi karon sa Tsina.
Gani, ang labing gamay nga ihap kay moabot na og 41 ang nangamatay samtang moabot og 1,600 na ang nataptan sa Wujan City sa Tsina.
Mao kini ang labing gamay nga mga-ihap. Apan naa say balita nga gidili karon ang paghulagway sa tinuod nga kahimtang sa Tsina.
Matod pa, pipila na gyud ka libo ang nangataptan samtang pipila na ka gatos ang nangamatay.
Naproblema na kuno ang mga awtoridad sa Tsina kay di na makontrola.
Dinhi sa Pilipinas, naabot na sa mga lokal nga awtoridad ang alarma.
Si Labella nag-presscon aron mosulti nga di niya i-ban ang pagdagsang sa mga Insek dinhi sa atua.
Si Moreno, sa iyang bahin, daw nag-information drive kabahin sa maskara ug ang saktong paggamit niini.
Kay daghan ang wala makauyon sa pamahayag ni Labella, napugos kini sa pag-clarify nga mag-ban kon mograbi ang sitwasyon.
Nahimuot ko kay di ba dapat pamahayag kini dapat sa mas taas-taas unta og ranggo?
Sigi na lang. Di pa man ulahi nga magpahigayon og information drive sa kabarangayan.
Dayon, makatilaw ang katawhan og serbisyo. Wa sila pasagdi sa kagamhanan.
Ang mahinungdanon karon kay angayang magtuon ang atong mga lokal nga opisyal kabahin sa coronavirus.
Kinahanglang lig-unon ang quarantine sa airport ug sa mga seaport. Magbantay kita sa mga dunay hilanat ug ubo.
Kinahanglang igo ang atong supply sa mga medical masks ug ang katawhan tudloan sa paggamit niini.
Imbes magatakag yawit dayon atubangan sa media, ang atong mga opisyal magpatawag dayon sa ilang mga medical personnel alang sa briefing kabahin sa coronavirus.
Di kita angay mokumpiyansa. Wa pa madiskubre ang tambal niini. Importante nga matambalan ang mga symptom hangtod mamatay lang ang maong virus.
Lahi man kon naa sa hospital nga giateman samtang sayo pa kay sa naa lang sa balay.
Sa pagkakaron gani, dia ko ubo bisan og walay naengkwentro nga Insek. Way kumpyansa, magpadoctor dayon. @anol_cebu sa Twitter