SUPERBALITA CEBU

Espinoza: Delikado sa highway!

Nagpakabana

PANAHON na. Di ni pagdayeg sa epekto sa Martial Law niadtong mga katuigan nga ubos ta sa mando sa balaod militar sa diktaborya ni kanhi presidente Marcos, apan nakahinumdum ko nga mao to ang mga katuigan nga walay mga tricycle nga makabiyahe sa highway sa rason nga dili libre sa drayber ug pasahero.

Nahibalik ang mga traysikol og biyahe sa mga highway dihang napalagpot si kanhi presidente Marcos sa gitawag nga “People Power Revolution” niadtong Pebrero 1986 ug ang milingkod nga presidente mao si kanhi Pres. Cory Aquino, ang biyuda ni kanhi Sen. Ninoy Aquino, nga gipusil-patay niadtong 1983 sa iyang pag-abot sa erport sa Manila gikan sa Amerika.

Gikan niadtong 1986 hangtud karon ang mga traysikol, depasaheron o di man, pirmi na nga moagi sa highway ug ang mga lokal nga kagamhanan gihatagan sa katungod paghatag og permit ug han-ay kon asa moagi o ang rota sa traysikol.

Dili malalis nga ang mga traysikol nga anha moagi o mobiyahe sa highway usa sa nakahatag og problema trapiko tungod kay makabara sila sa dalan kay hinay modagan unya magptunga pa sa dalan, nga ang mga dagko nga sakyanan sama sa trak, bus, ug awto maproblema og obertek.

Karon, nakita sa Department of Interior and Local Government (DILG), nga ang pagbiyahe o pag-agi sa mga traysikol sa highway labina sa mga despasaheroan usa ka dakong resgo di lang sa drayber, pasahero apan lakip na sa mga dagkong sakyanan. Nakadugang sad sa problema sa trapiko ang mga traysikol.

Tungod niini, ang DILG nagmando nga di na makaagi sa highway ang mga traysikol ug gimandoan ang opisyales sa mga LGU nga ilang tan-awon og balik ang mga permit nga ilang nahatag sa mga traysikol operator kon nakasubay ba sila sa lagda sa trapiko.

Sa tinuoray lang, traysikol nakatabang man usab sa pakinahanglan sa atong mga kaigsoonan, apan miabot na ang pahanon tungod sa grabe na nga trapiko nga dili na sila angayan nga moagi pa sa highway. Adto na lang ang traysikol moagi sa municipal ug barangay roads diin mas gikinahanglan ang ilang serbisyo.

Apan, di ba morag kataw-anan nga ang DILG ang nakakita sa problema nga natampo mga traysikol sa atong kadalanan labina sa highway ug dili ang Land Transportation Office (LTO) o Department of Transportation (DoTr) o di ba ang Department of Public Works and Highways (DPWH) nga ila unta nga trabaho?

Gani, lain nga kahibulongan nga ang mga lokal nga kagamhanan ang dunay katungod paghatag sa permiso sa mga traysikol nga makabiyahe og mamasahero sa ilang dapit samtang ang habal-habal, nga karon nahimong gubot, moadto pa og kongreso aron maamendar ang balaod nga nagdili nga himuon nga pasaheroan ang motorsiklo sa rason nga dili libre.

Sa mga nagmaneho og awto, trak ug bus nakakita nga ang mga traysikol, gawas nga makatrapik sa highway, usa ka dakong resgo nga anha moagi ug mamasahero sa highway kay hinay na og dagan unya ang drayber magpatunga pa, nga morag nakatag-iya sa highway. Atong tan-awon kon makapatuman ba ang mga LGU ning orden sa DILG.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph