AMBOT og nganong hangtod karon daw og sa wa man mosanong ang mga barangay officials kalabot sa gipagawas nga kamandoan sa Department of the Interior and Local Government (DILG) nga mao nay mangunay sa pag-implementar sa road clearing operations diha sa ilang tagsatagsa ka mga dapit.
Niadtong Enero 9, 2020, ang hepe sa local government monitoring and evaluation division sa DILG 7 kinsa mao usab ang officer-in-charge sa DILG-Cebu City, miluwat ning maong kamandoan diin ila kining ipatuman sulod sa 75 ka mga adlaw.
Iyang gipahimatngonan ang mga kapitan nga dili magpanagana ang ilang buhatan sa pagpasaka og kaso niadtong mga dili mosunod sa maong kamandoan.
Pero bisan pa niini, naobserbahan nga mora og gibaliwala ug gani daw sa nagpakabuta- bungol lang ang mga kapitan kay nidaghan na man hinuon kining nag-illegal park sa kadalanan.
Pananglitan, kanang tumoy nga bahin sa Barangay Bulacao, dakbayan sa Sugbo, diin dayag nga gihimo nang terminal ang kalsada ug taytayan sa mga jeep depasaheroan ug tricycle ilabi na og peak hours.
Mahibulong na lang ta kon nganong hangtod karon wa gihapon kini mabadlong sa ilang kapitan. Mao usab kini sa ubang mga barangay.
Labaw pang way gihimo ang Cebu City Traffic Operations (Ccto).
Si Raquel Arce, ang hepe sa Prevention, Restoration, Order, Beautification and Enhancement (Probe), mikompirmar nga daw og sa nagpanuko sa pag-implementar ang mga kapitan sa direktiba sa presidente.
Nahadlok siguro nga tingali makontrahan ug mawad-an og mga botos inig abot sa piniliay. Hinaot nga maaksiyonan kini sa hingtungdan ahensiya kay kon di morag insulto kini sa presidente.