HALOS mag-upat na ka bulan nga dili na gapainterbyu sa mga sakop sa prensa si Misamis Oriental Governor Yevgeny Vincente Emano.
Limitado usab kaayo iyang mga tubag kung pangayoan og pahayag diha sa messenger ug text messages.
Uwahing nahinabi kini sa mga media niadtong bulan sa Septiyembre 2019 atol sa gipangunahan niining pag activate sa Task Force Elcac (End of Local Communist) ug uwahing press conference niadtong bulan sa Oktubre atol sa pagbisita sa mga kandidata sa Miss Earth.
"I love you all," kini ang kanunay niya isulti sa mga media nga mokober sa kalihokan sa Kapitolyo probinsyal.
Kagahapon sa Lunes, Enero 27, atol sa pagpakayab sa nasudnong bandila nangayo kini og pasaylo sa mga sakop sa prensa.
Iyang gipaabot nga dili na siya magpainterbyu kay dili na niya bout motumpang sa mga batikos ug isyu.
"Kung inyong namatikdan this past few months last quarter of 2019, wala nako motumpang sa mga isyu ug batikos sa sa akong mga kaatbang kay para sa ako gawas nga usik sa panahon gawas nga walay kamatouran kapoyan ko storya balik-balik nga mura tag bata," butyag niini.
Dugang ni Emano nga importante alang kaniya nga sulod sa unom ka tuig nakita sa katawhan ang iyang pagserbisyo.
"Mangayo ko pasaylo sa mga miyembro sa prensa nga dina kaayo ko gapainterbyu, if interbyu maglabay labay storya makausik lang sa panahon but what is important that we are doing things that are good for the province kay bisan unsaon nako og tumpang diman sila moundang."
Gihulagway sab niini iyang kaugalingon nga sama sa hinog nga mangga.
"Mura ra gud gihapon na og punoan sa mangga kung asa tong pinaka hinog nga unod maoy unang labayon maoy gakahitabo sa atoa bun-og kaayo ta sige labay. pero maayo nalang na kitay sige labayon kay sa kita manglabay., it had been working for me actually because I was able to focus more on work," matud niini.