WALA'Y respeto ug naka-menos matud ang mga nasyonal nga ahensiya sa lokal nga kagamhanan sa siyudad sa Cagayan de Oro human gi-dedma lang ang gipatawag nga panagtagbo sa komitiba sa Trade and Commerce.
Nasayran nga nagpatawag og panagtagbo si Konsehal George Goking sa Department of Health (DOH), Food and Drugs Administration (FDA) ug Pharmacist Association kalabot na sa isyu nga dunay overpricing sa mga tambal sulod sa botika sa mga pribadong ospital.
Gibutyag ni Goking nga walay respeto ang maong mga ahensiya tungod kay wala kini nitunga sa iyang pagpatawag og panagtagbo aron unta mahatagan og katin-awan ang alegasiyon.
"It was not a good sign of respect for a local government either naka menos sila or unsa paba'y adjective nga wa lang gyud sila'y pagtahod kay they're telling us nga national office sila pero kanang buhis, ang buhis nga gibayad sa national gikan daghan man namayad sa atong siyudad sa Cagayan de Oro," matud ni Goking.
Gidugang pa niini nga kinahanglan nga magpakita sila og respeto tungod kay alang man usab kini sa tanan.
"They should show respect to the local government, kay nagpatawag man mi para mahatag nila ang ilang side," dugang pa.
Gidugang pa nga kung dili sila hatagan og pagtagad ug mag-endorso og persona non grata ilabi na nga susama kining nagpabor sa taas nga presyo sa tambal.
Giingong daghan ang mga nakasinati niining overpricing sa tambal ug gani usa niini si Atty. Edgardo Egay Uy, kinsa Vice-chair sa City Price Coordinating Council tungod sa pagka-ospital sa nipanaw na niini nga asawa.