HINGPIT na nga gipasaka ang kasong murder batok sa mga suspetsado nga nagparegla ug nagbundak og bato sa leadman niadtong Enero 20 sa Barangay 1, Balingasag, Misamis Oriental.
Gipasakaan og kasong murder ang lima kinsa usa niini ang nasikop nga nailang si Fausto Longimo, 25, ulitawo ug maoy nagmaneho sa motorsiklo kinsa residente sa Lagonglong, Misamis Oriental.
Samtang gawasnon pa si alyas Ekon, kinsa maoy prime suspect, ug alyas Kokoy.
Sa pakighinabi kang Police Executive Master Sergeant Antonio Jesus Salvacion, ang imbestigador sa Balingasag Municipal Police Station gikabutyag niini nga lima na ang gikasohan og murder.
"Naa nami nadakpan nga isa si Fausto alyas dodong, gikasohan na namo ang iyang mga kauban nga upat kabuok bale lima sila tanan ang among gikasohan og murder," matud nu Salvacion.
Gidugang pa nga wala silay nakitang panagbingkil apan gipareglahan lang sa mga suspek si Argei Tresquio.
"Wala gyud nakita nga nagbikil ang grupo sa biktima gani sa testimonya sa witness before sila nihawa sa pantalan nag-istorya ang prime suspect nga kung naa silay makita nga magbaklay ilang birahan," dugang pa.
Samtang sa bahin ni Lomingo, gipanghimakak niini ang alegasiyon nga apil kini sa maong kagubot ug igo lang nga nag-drive sa motor ug angkas sila si alyas Kokoy ug alyas Ekon.
"Nagdrive lang ko sa motor, kaila ko ato makatug-an ko sa nagbundak gyud sa bato, silingan ra to namo, akong pasahero niambak," matud ni Lomingo.
Padayong gipangita sa kapulisan ang maong mga suspetsado.
Samtang nagpasalamat nalang usab ang pamilya sa biktima tungod kay hinayhinay na nga nadakpan ang mga suspek ug napasaka na ang kaso apan buot gyud niini nga masikop ang tanan nga nipatay sa biktima.
Daghang tabang usab ang nadawatan sa pamilya lakip na mga tabang pinansyal nga gikan sa gawas sa nasud, mga indibidwal nga dunay malumong kasing-kasing ug mga nagsimpatiya kanila human nag-viral sa social media.
Gani lakip si Mayor Oscar Moreno ang mismong naghatag sa iyang personal nga tabang ngadto sa biktima.