ANG Cebu City Government ug ang duha ka mga higanteng developer mopahigayon sa ilang ground breaking sa 26 ka ektarya nga development sa South Road Properties karong Miyerkules, Enero 29.
Ang consortium sa SM Prime Holdings Inc (SMPHI) ug Ayala Land Inc nga gikatakdang nga mogasto og P316 bilyones makahatag og duha ka milyon nga trabaho (direct, indirect jobs) sa mosunod nga 20 ka tuig.
Si Mayor Edgardo Labella nagkanayon nga makahatag usab kini og binilyon nga buhis gikan sa Business Tax ug Real Property Tax nga magamit sa siyudad nga magamit sa nag-unang panginahanglan sa siyudad ug konstituente.
Atol sa presentasyon sa SMPHI ug Ayala dihang gipatawag sa konseho nagkanayon nga makakolekta ang Cebu City og P22 bilyones sa maong proyekto.
Ang mayor nagkanayon sa adlawng Miyerkules, Enero 29 ang mga executive sa SMPHI ug Ayala Land ang motambong para saksihan ang makasysayanon nga proyekto nga maoy labing dako nga puhonan nga gibubo sa Sugbo.
Dugang pa sa mayor nibutyag nga ang maong ground breaking maoy nagsilbi nga timaan nga sugdan na ang maong proyekto.
Lakip sa tukorong edepisyo mao ang 16,000 seaters nga arena diin mahimo na kining mo-host sa NBA games, international concert ug ubang kalihukan nga tambungan sa libuan ka mga individual.
Si Labella nipasabot nga ang job generation nga mamugna sa consortium sa duha ka higanteng developer subay sa resulta sa ilang gipahigayon nga feasibility study diin priority ang mga Cebu City residents ug lalawigan sa Sugbo sa higayon nga mag-hire na sila og trabahante.
Si Labella uban sa City Legal Office pinangulohan ni Atty. Rey Gealon nagkanayon nga wala nay babag sa development sa 26 hectares sanglit ang tanang kaso nga gisang-at sa opposition pulos gibasura sa korte apil na ang Court of Appeals.
Ang 26 ektaryas kabahin sa 46 ektaryas nga yuta sa SRP nga nabaligya niadtong Agusto 7 tuig 2015 sa panag-tandem ni kanhi Mayor Michael Rama ug Bise Mayor Labella. (PAC)