NAPASAKAAN na og kasong arson ngadto sa buhatan sa piskaliya kadtong residente nga miunay og sunog sa ilang balay ug miamong sa laing 62 ka mga balay sa Sityo Panagdait, barangay Kasambagan, Cebu City niadtong Dominggo, Enero 26.
Kini maoy gitug-an ni F02 Emerson Arceo sa dihang pormal nang nag-atubang sa maong reklamo ang suspek nga si Guillermo Canabe Jr., 30.
Matod pa sa fire investigator nga lig-on ang testimonya sa mga nakasaksi sa hitabo ug mismo ang suspek miangkon sa iyang nahimo.
Sa 62 ka mga balay nga na-ugdaw adunay 42 ka mga pamilya ang apektado nga moabot 450 ka tawo.
Nasayran sab ni Arceo nga ang mga ginikanan ni Canabe ang giingong milayas sa dapit human hitabo nga posibleng dili kaharong sa mga silingan nga na-angin sa binuhatan sa ilang anak.
Nailhan na ang kadtong nakalas sa sunog nga si Leo Armamento, 49 ang wa makagawas sa tangkal diin siya gihipos sa iyang kabanay kay matod pa adunay suliran sa pangisip.
Samtang adunay 170 ka mga nabiktima sa sunog sa Sityo Panagdait, Barangay Kasambagan, dakbayan sa Sugbo ang makadawat og hinabang pinansiyal gikan sa kagamhanan.
Ang Department of Social Welfare Sevices (DSWS) motunol og tag - P20,000 alang sa homeowners ug P10,000 sa mga nag-abang.
Samtang si Cebu City Mayor Edgar Labella ang nakig-alayon sa National Housing Authority (NHA) aron nga mahatagan og housing materials ang mga nasunogan ug P30,000 matag pamilya.
DSWS officer-in-charge Jeffrey Ibones nagkanayon nga motunol sab sila og pagkaon sa mga nabiktima katulo sa usa ka adlaw, sulod sa tulo ka adlaw.
Sa mosunod nga mga adlaw ang DSWS mohatag og bugas ug de lata. (BBT, AYB, JJL, FVQ)