USA ka 80-anyos nga babaye ang patay na nga napalgan sa pangpang sa barangay Maghaway sa siyudad sa Talisay niadtong Dominggo sa hapon, Enero 26.
Usa ka silingan sa biktima nakakita sa lawas sa tiguwang, kinsa dali nga nakapangayo og tabang sa laing mga silingan ug sa kapulisan.
Giila ang patayng lawas nga iya kang Sarah Capul, molupyo sa Area 6, Urban Poor, Barangay Maghaway.
Positibo kini nga giila sa iyang anak, kinsa nibutyag sa Talisay City Police Station nga niadtong Enero 18 pa nila gipangita ang inahan human gituohang nigawas sa panimalay.
Matud sa anak, nga adunay sakit nga Alzheimer nga gihambin si Capul, hinungdan nga gidid-an na unta nila kini nga makagawas sa panimalay.
Si Rene Casimsiman, usa sa mga silingan sa namatay nitug-an nga sa mga miaging adlaw pa niya napanimahuan ang bahong patay diha dapit sa pangpang.
Niadtong Dominggo sa hapon, tungod sa pagpangulisbaw na sa kabaho, giingon nga gisusi na kini ni Casimsiman kon unsay hinungdan sa bahong patay.
Ug didto napalgan ang nadugta na nga lawas ni Capul.
Sa inisyal nga pakisusi sa kapulisan nasuta nga aksidenti nga natagak ang 80-anyos nga si Capul ngadto sa pangpang ug nakaangkon kinig mga samad sa lawas tungod sa pagkaigo sa mga bato, hinungdan nga nakabsan kini sa iyang kinabuhi.
Bisan pa man niini. nirekomendar ang Talisay City Police Station sa kabanay nga ipaubos sa autopsy ang patayng’ lawas sa tiguwang, aron sa pagsuta gyud kon wala bay foul play ang kamatayon niini. (FMD)