GISUMBAG ang kapitan sa Barangay Tabok, Mandaue City sa hepe sa Disaster Risk Reduction Management Office (DRRMO) atol sa gipahigayong senior citizen election sa maong barangay niadtong Dominggo, Enero 26, sa hapon.
Nahinabi sa Superbalita Cebu si Dario Tarriman, ang kapitan sa Tabok, niingon nga atol sa senior citizen election nahibulong siya nga anaa ang presensya ni Felix Suico Jr., ang chief sa DRRMO ug kanhi kapitan sa Brgy. Tabok nga dili man kini miyembro sa senior citizen.
Sila si Suico ug Tarriman pulos nanagan isip kapitan sa maong barangay miaging barangay election kung diin nadaog si Tarriman.
Upat na kini nga eleksyon nga ang duha nagka-atbang.
Sigon sab ni Tarriman nga gisuwayan kini niya og papahawa si Suico ug asawa niini apan, wala gyud kini mupahawa sa tungod sa ballot box ug niresulta sa panaglalis niini.
“Ako siya giingnan nga pildi gyud ko nimo da, pildi ko nimog 400, nya mao to mura syag natandog nya nigawas iyang bana nya giditso ko ug sumbag,” sigon ni Tarriman.
Nasumbagan si Tarriman kausa ni Suico sa baba ug sigon ni Tarriman nga giabisohan siya sa mga espesyalista nga magpa-admit tungd sa sa medical history niini nga head stroke niadtong 2009 ug angioplasty niadtong 2016.
Gipa-blotter na ni Tarriman si Suico ug sigon niya nga dili lang kini una nga higayon nga si Suico manukmag.
Nahinabi sab sa Superbalita Cebu si Patrolman Eduardo Martinez, pulis sa Basak Police Station
Sigon niya nga ang duha ka partida nag-isig blotter sa usag-usa sa maong estasyon.
Sa blotter report ni Suico batok kang Tarriman nga alas 5:20 sa hapon niadtong Dominggo, Enero 26, si Tarriman hubog nga nisulod sa Basak Barangay Gym atol sa senior citizen election.
Giinsulto ni Tarriman ang asawa ni Suico.
Miingon si Suico ngadto kang Tarriman, “Maayo pre nga mogawas ka kay aron mahuman ang pagbutohay,”
Sa blotter report sab ni Tarriman batok ni Suico nga naglalis siya ug ang asawa ni Suico ug niresulta sa pagpanukmag ni Suico.
Sigon sab ni Martinez nga ang maong blotter report “for record purposes” lang ug wala pa nipakita ug interes ang duha ka partida nga mupasaka ug kaso.
Gikuhaan sab og habig sa Superbalita Cebu si Suico apan gipili niini nga magpakahilom ug dili una mohatag og statement bahin sa hitabo.