Editoryal: Ngipon sa balaod

NAMATIKDAN ning panahona nga nagkadaghan na ang mga traysikel nga nanagan sa kadalanan, lakip na kining gitawag nila og habal-habal.

Nagkaanam og kadaghan ang maong matang sa transportasyon gumikan kay gawas nga dunay mga lugar nga di maabtan sa mga depasaheroang sakyanan, nahimo na sab nga panginabuhi kini sa atong mga kaigsuonan.

Apan bisan gani dinhi sa downtown area, makita pa kini nga matang sa sakyanan, ilabi na gyud mga traysikad.

Bisan sa mga highways kon diin dagkong mga trak ug sakyanan ang nangagi, ilabi na sa may Toril ug Crossing Matina sa siyudad sa Davao, tabok-tabok ang mga traysikel ug traysibot sa dalan.

Tinuod, nakasabot ang gobyerno nga usa kini ka matang karon sa panginabuhian sa katawhan, apan di ikalimod nga peligro sab kini sa disgrasya, di lang sa mga drayber, apan labi na gyud sa ilang mga pasahero nga naglakip sa mga batang estudyante.

Di lang kausa o kaduha ka higayon nga dunay nadisgrasya niini diha sa kadalanan, kon diin mikalas pa kini og kinabuhi.

Busa angayan lang tuod nga i-regulate ang maong matang sa transportasyon aron nga malikayan ang daghan pang mga disgrasya nga mokalas og kinabuhi.

Kini base na sa gipagawas nga mando sa Department of the Interior and Local Government (DILG) nga tanang mga lokal nga panggamhanan, siyudad man o munisipalidad, subling mosusi sa kasamtangan nilang mga ordinansa nga nag-regulate sa mga pedicabs ug traysikel nga nabiyahian sa lokalidad ug ipahaum kini sa mininum standards sa Department of Transportation (DOTr).

Kini naglakip sa pagdili kanila sa paglabigar sa mga highways ug mga dakong kadalanan sa lokalidad.

Hinuon, kini nga mando hagbay na kini nga gipatuman sa lokal nga kagamhanan sa siyudad sa Davao. Apan taliwala sa paningkamot, hangtud karon naa pa gihapoy daghan nga nagsupak sa maong kamandoan.

Tingali og kuwang lang og istriktong paagi sa pagpatuman niini lokalidad aron nga mga hingtungdan mosunod.

Angay tingali nga butangan og ngipon ang balaod aron nga masegurong matuman ang maong balaod.