COTABATO CITY -- Way maayong resulta ang pag-inilogay sa mga molupyo sa hus sa Bureau of Fire Protection (BFP) aron nga palongon ang nisilaob nga kalayo alas 8:45 sa buntag niadtong Lunes, Enero 27, sa dakbayan.
Kini human nga 17 ka mga balay ang naabo sa maong insidente.
Gawas sa pag-inologay sa mga molupyo sa hus sa mga bombero, ang kapiot sab sa dalan sa lugar nakatampo sa pagpakgang sa kalayo.
Sa taho gikan sa BFP-Cotabato City, nasayran nga nakadawat sila og tawag sa nahitabong sunog sa Purok Makina, Barangay Bagua 2 sa dakbayan.
Abtik nga nagresponde ang kabomberohan sa gobyerno, uban ang Chinese Fire Brigade ug nagtinabangay sa pagpalong sa kalayo.
Apan matud ni Fire Officer 3 Angelie Maquilan sa BFP-Cotabato City nga naglisud sila sa pagsulod sa dapit nga nasunogan gumikan sa kapiot sa dalan.
Nidugang pa sa suliran mao ang mga molupyo nga nag-inilugay sa hus sa BFP aron unahon ang ilang mga balay nga pasiritan sa tubig.
Tungod sa kadako sa kalayo, usa ka apartment ug 17 ka balay ang naabo.
Daghan ang nagtuo nga posibleng suplay sa kuryente ang hinungdan sa sunog gumikan kay daghang nagkoneksiyon (series) niini samtang ang uban daut ang linya.
Gisusi pa sa BFP sa Cotabato City kon pila ang damyos sa maong sunog. (Edgar E. Fuerzas)