MILANOG ang mga singgit nga “Kobe!” ug “MVP! MVP!” sa usa ka plaza duol sa Staples Center kagahapon gikan sa nagkahiusang mga sumosunod sa Los Angeles Lakers nga nagbangutan sa kalit nga kamatayon ni basketball superstar Kobe Bryant.
Daw bukid ang nagtipun-og nga mga buwak nga giadornohan og mga ballon nga adunay kolor nga purple ug yellow unya nagsuwat og mga mensahe ang mga sumosunod ni Bryant.
Ang gitawag og Black Mamba nipanaw sa edad nga 41 hasta ang iyang 13 anyos nga anak ug laing pito nga sakay sa helicopter nga na-crash sa Calabasas, California sa miaging adlaw.
Babaye, lalaki, batan-on ug tiguwang ang nagkatapok sa downtown Los Angeles aron ipadayag ang ilang pahasubo alang kang Bryant, kinsa nagtunol og lima ka mga kampiyunato sa Lakers.
Dili man tuod lumad nga taga Los Angeles si Bryant apan gihangop kini sa siyudad nga ‘adopted son.’
Si Bryant, kinsa natawo sa Philadelphia, nakahatag og saktong lingaw sa mga taga Los Angeles gumikan sa iyang abilidad nga gipagawas sulod sa 20 ka mga tuig niyang pagduwa sa Lakers.
Gikan sa high school, si Bryant miambak deretso sa National Basketball Association (NBA) niadtong 1996 diin gipili siya sa Charlotte Hornets isip No. 13 overall pick. Human sa drafting, gi-trade ra sab dayon sa Hornets si Byrant ngadto sa Lakers.
Kaabag ang higanteng si Shaquille O’Neal, naangkon ni Bryant ang nag-una niyang tulo ka mga titulo diin sunodsunod kining nasakmit sa Lakers niadtong 2000 hangtod 2002.
Dihang nabalhin sa laing team si O’Neal niadtong 2004, hayan si Bryant na ang nahimong labing sinaligan sa Lakers.
Sa pagpangulo ni Bryant, ang Lakers nakabaton na sab og laing duha ka mga titulo niadtong 2009 ug 2010 apan ning mga higayuna, tataw nga paingon na sa kinatumyan ang basketball career ni Bryant.
Human niini, nagsalimoang na ang Lakers hangtod nga miretiro si Byrant niadtong 2016.
Ang mga natampo ni Bryant sa Los Angeles nagsilbe niyang sukli sa siyudad nga nagmahal kaniya isip usa ka tiunay nga anak.
“He grew up there,” matod pa ni Golden State Warriors general manager Bob Myers kabahin kang Bryant. “He grew up and matured and changed and evolved. I’m sure they felt like they grew up with him.”
Lakip sa dili malimtang panghitabo sa Staples Center mao ang kamangtas nga gipakita ni Bryant niadtong Enero 22, 2006 diin nakamugna kini og 81 puntos sulod lang sa usa ka duwa.
Mao kini ang ikaduha nga labing dakong puntos nga nahimo sa usa ka magduduwa sa usa lang ka duwa sa kasaysayan sa NBA.
Dili lang tungod sa iyang binuhatan sulod sa korte gimahal sa taga Los Angeles si Bryant kon dili hasta sab sa gawas sa korte.
Sa wala pa miretiro si Bryant, siya ug ang iyang asawa nagtukod og usa ka foundation nga nagtabang og uyamot nga mga pamilya ug mga bata.
Usa lang kini sa maayong mga binuhatan ni Bryant nga iyang gibubo sa Los Angeles.
“He wasn’t just an athlete. He gave the city hope,” matod pa usa ka sumosunod sa Lakers nga si Jason Ackerman. (AP, ESL)