BISAN wala ang ilang duha ka mga lider nga sila si James Harden ug Russell Westbrook, ang Houston Rockets nakamaneho gihapon pagbuntog sa hosts Utah Jazz, 126-117, kagahapon sa National Basketball Association (NBA).
Wala man tuod sila si Harden ug Westbrook apan daw misagol ang ilang mga espiritu ngadto kang Eric Gordon, kinsa nagpakatap og iyang career-best nga 50 puntos aron panghulohan ang Rockets.
Si Gordon mirehistro og 14-of-22 sa fieldgoal shooting lakip na niini ang 6-of-11 three-pointers, ug 16-of-20 freethrow shooting.
Si Gordon maoy ikatulong magduduwa sa Rockets nga nakamugna og 50 puntos o pataas sunod nila ni Harden ug Hakeem Olajuwon. Nakahimo niini si Harden sulod sa 23 ka mga higayon.
Gikinahanglan gyud sa Rockets ang kamangtas ni Gordon gumikan kay gawas nila ni Harden ug Westbrook, wala sab ang laing pambato sa team nga si Clint Capela.
Mao kini ang labing unang higayon ning maong season nga nakaabot og kapin sa 30 puntos si Gordon.
Sulod sab sa 22 ka mga duwa nga wala nakapakita og aksyon si Gordon human sa iyang operasyon sa tuhod.
Sa iyang pagbalik, nag-average si Gordon og 20 puntos sulod sa 13 ka mga duwa.
Kini maoy ikaduhang sunodsunod nga duwa nga wala si Harden kay nagpaalim kini sa iyang angol (left thigh). Si Capela adunay angol sa tiil samtang si Westbrook gipapahuway sa coaching staff.
Ang Rockets mingsaka sa 29-17 nga rekord, ikaunom sa Western Conference diin nagpabilin ang Jazz sa ikaupat nga dapit dala ang 32-14 nga rekord. (AP, ESL)