NAGSUBAY gihapon sa dalan ang higanteng Sugboanon nga si JuneMar Fajardo alang sa iyang ikaunom nga sunodsunod nga MVP award sa Philippine Basketball Association (PBA) apan ning higayuna, adunay dagkong mga babag sa iyang agianan.
Gipangtumbok mao sila si Jayson Castro sa Talk N’ Text KaTropa, Fil-German Christian Standhardinger sa NorthPort Batang Pier ug CJ Perez sa Columbian Dyip nga pulos adunay kapasidad nga moilog sa trono sa pambatong sentro sa San Miguel Beermen.
Ibutyag ang mahimong MVP sa miaging season sa Leo Awards nga ipahigayon karong Marso 1 atol sa pagsugod sa 45th season sa Araneta Coliseum.
Si Fajardo, kinsa produkto sa University of Cebu (UC) Webmasters, maoy midaog sa Best Player of Conference award sa Philippine Cup, si Castro sa Commissioner’s Cup samtang si Standhardinger sa Governor’s Cup.
Sa iyang bahin, si Perez nahimong usa ka lig-ong kandidato sa BPC award sa duha ka mga komperensya hinungdan nga usa sab kini ka lig-ong kandidato alang sa MVP title.
Kon statistics ang hisgutan, sila si Fajardo ug Perez mao ang nag-una. Ang The Kraken nakatigom na og 39.6 SPs samtang si Perez, No.1 rookie, adunay 33.47 SPs.
Si Perez maoy nag-una sa scoring pinaagi sa iyang average nga 20.8 puntos, nagsunod si Matthew Wright sa Phoenix Fuel Masters (18.9) ug ikatulo si Fajardo (18.87).
Hinuon dili lang ang statistical points maoy basihan sa pagpili og MVP.
Ang lig-ong mga kandidato alang sa Mythical First Team ug Second Team naglakip nila ni Troy Rosario (TNT), Scottie Thompson (Ginebra), Alex Cabagnot (SMB), Robert Bolick (NorthPort), Rashawn McCarthy (Columbian), Jeron Teng (Alaska), Chris Ross (SMB), Paul Lee (Magnolia), LA Tenorio (Ginebra), Poy Erram (NLEX), Chris Banchero (Magnolia), Arwind Santos (SMB) ug Greg Slaughter (Ginebra).
Si Perez maoy labing inilog nga modaog sa Rookie of the Year award.
Ang ubang mga pasidungog ang buhian sa Leo Awards mao ang Most Improved Player, Sportsmanship Award ug ang All Defensive Team. (ESL)