HANGTOD karon nga dako na si Gab ug usa na siya ka opisyal sa barko nga magbiyahian ngadto sa lainlaing mga nasod, dulot sa bukog gihapon ang iyang pagdumot sa dagat. Kini tungod sa nahitabo sa iyang tatay Omentg nga hangtod karon wala na gayud igdungog. Kabos nga mananagat si tatay niya ug matag palawod aron managat ikuyog gayud siya niini. Ug didto sa lawod, usa ka higayon niana, nasugatan silag bagyo. Gikuso-kuso ang ilang sakayan sa dagkong mga bawod ug grabeng kulyada sa hangin. Gidali paghigot sa iyang tatay ang pisi diha sa iyang (Gab) hawak ug ang pikas tumoy sa pisi gihigot sab sa usa ka dako ug basiyong kontiner, kon magkinaunsa man, kon malagpot si Gab, dili siya mahimulag sa kontiner ug maluwas siya sa tino nga kamatayon. Kining tanan nasaksihan sa mga mata ni Gab..
“Gabriel, anak, Ginuo na lay mahibawo nato niini!” singgit ni tatay niya Omeng.
Unya usa ka kusog kaayong hampak sa dakong bawod nakapalagpot kanila. Dinhi rang tungora ang hanihumdoman ni Gab sa maong esena sa kalisdanan kay nawad-an siyag panimuot.
Pagka buntag sa sunod adlaw nabangalan si Gab didto sa usa ka baybayon sa balangay sa Santa Barbara. Dili na niya malihok ang iyang lawas ug dili pa siya makasulti tungod tingali sa usa ka gabiing nag-utaw-utaw siya sa lawod hangtod nga gidagsa siya sa baybayon.
Usa ka buotang magtiayon nga dunay anak nga babaye nga katalirungan ni Gab sa edad maoy nakabangal kaniya sa baybayon. Giatiman ug giamumahan nila si Gab hangtod nga naulian siya sa maayong panimuot ug gibalikan sa kalagsik. Dihang iyang nasayran nga wala na igkita si tatay niya Omeng, mihilak siya taman sa ginhawa. Gibatig kaluoy ang magtiayong Jose ug Nimpa. Apan wala silay nahimo sa midangat nga kapalaran ni Gab nga wala na ang iyang amahan.
DUGAY na kadto. Ug karon Kapitan na si Gab sa usa ka barko nga magbiyahian sa laing mga nasod. Maayo na sad ang iyang kahimtang. Duna na siyay matahom ug modernong balay nga nahimutang sa usa ka subdibisyon sa siyudad.
Usa ka higayon, nanuroy sila si Eliza, iyang hinigugma, sa usa ka beach resort. Si Eliza anak sa usa ka adunahang magpapatigayon nga mestiso Insek dinhi sa balangay sa Santa Barbara. Dako kaayo ang gugma ni Eliza kang Gabriel.
“Gab, nindot kaayo tan-awon ang dagat, no? Labi na nga milantong na kini,” matod ni Eliza nga milantaw sa halapad nga dagat sa unahan.
“No! Dili nindot ang dagat, Liz! Kon dunay labing bati nga talan-awon dinhi sa kalibutan, alang kanako kini mao ang dagat!” Dali dang nakatubag si Gabriel. Nahibulong si Eliza.
“Gab, okey ka lang?” ni Eliza nga miiknat ang mga kilay.
“No! Dili ko okey, Eliza. Basta bati, laksot, lampingasan ang dagat!” Mikagot ang bag-ang ni Gab ug nakumo niya ang iyang mga kamot. Ug dayon milakaw siya paingon sa lapyahan.
Miubog si Gab sa dagat. Nakita ni Eliza nga pinaagi sa duha ka kamot ni Gab mikawos kini sa tubig-dagat ug unya giinom. Mikawos pag-usab ug giinom. Mipuno pagkawos ug giinom. Unya misinggit siya, “Tayyy Omeng! Dili gyud ko mohunong paglatas sa mga lawod sa kalibutan aron pangitaon ang kasingkasing sa bagis ug pintas nga dagaaattt! Gusto ko, Tay Omeng, nga iya sab kong hunusan sa kinabuhi, sama sa paghunos niya sa imong kinabuhi. Apan sa kadugay na sa paglibot ko sa kalibutan sakay sa usa ka barko, nganong wa man ko niya patyaaa? Ahhhh, talawan ang dagatttt! Maluibon ang dagattt!”
Si Eliza nga nakasaksi ug nakadungog sa tanan gibati og kabalaka. Miubog sab siya sa tubig-dagat paingon sa lapyahan aron pangutan-on si Gabriel nganong hilabihan ang pagdumot niini sa dagat.
(Katapusan)