DAGHAN kaayo ang naguol sa kalit nga pagkamatay ni Kobe Bryant, ingon man sa iyang anak nga si Gianna kaniadtong Domingo.
Matod pa sa balita, pagka-crash sa helicopter nga ilang gisakyan ang hinungdan sa kamatayon.
Matod pa sa usa ka fan ni Kobe, gisakitan kaayo siya sa nahitabo bisan dili sila amigo o kaila ni Kobe.
Og labaw sa tanan, sama sa gibati sab niya ang kasakit nga gibati karon ni Vanessa nga gawas nga namatyan sa iyang bana, namatyan pa gyod sa iyang anak.
Ug midugang pa siya nga pagka-sakit seguro sa gibati ni Kobe sa dihang paingon na sila nga mobagsak o mohagsa unya nakita niya nga wala siyay mahimo pagluwas sa iyang anak nga babaye nga si Gianna.
Ingon usab niini ang gibati karon sa kadaghanan sa mga katawhan.
Kon imong tan-awon ang Facebook karong panahona, napuno sa mga posts mahitungod ni Kobe ang imong makita.
•••
Dunay luna sa kasing-kasing ni Kobe Bryant ang mga Pinoy.
Nasayod siya nga hakog kaayo sa dula nga basketball ang mga Pinoy. Nasayod sab siya nga mahigugmaon kaayo nga motan-aw ang mga Pinoy sa dula nga basketball, apil na ang mga dula sa NBA.
Og mao kini hinungdan nga kadaghan na moanhi sa Pilipinas si Kobe.
Dinhi siya kaniadtong 1998.
Unya mibalik na sab siya kaniadtong 2007, 2009, 2011, 2013 ug ang kataposan niyang pag-anhi kaniadtong 2016.
Dinhi makita og unsa kadako ang pagtahod ni Kobe sa mga Pinoy.
•••
Unsa ang paagi sa pagdala sa mga nabiktima sa corona virus ngadto sa mga tambalanan? Mao kini ang kasagaran nga pangutana kon maghisgot na sa corona virus.
Ngano man?
Tungod kay kon mangutana ka sa mga LGU, kasagaran kanila dili maka-tubag og tarong kon unsa gyod ang proseso mahitungod niini. Kasagaran kanila molingo-lingo lang o kaha magpitok-pitok lang ang mata samtang hilom pas awaaw ang ilang reaksiyon.
Sama ra kini sa nahitabo sa African Swine Fever (ASF).
Ang gihimo sa mga probinsiya dinhi sa rehiyon 7 mao ang pagpugong sa pagsulod sa mga baboy o mga pagkaon nga gikan sa karne nga baboy nga gikan sa Luzon o bisan sa mga kanait nga mga probinsiya.
Apan kon imong pangutan-on ang maong mga probinsiya kon andam ba sila nga moatubang sa maong problema kon ugaling makasulod man sa atong rehiyon ang maong ASF, kasagaran kanila walay ikatubag.
Kasagaran kanila dili andam sa mga himan o instrumento nga gamiton batok sa ASF sama sa personal protection equipment (PPE).
Kasagaran kanila dili andam kon asa ibutang ang ilang lubnganan sa mga baboy nga gipatay, unsaon pagpatay ang baboy nga dili molapas sa Animal Welfare Act o kaha, unsaon pagpagawas ang ilang pundo alang sa pagpanalipod sa ilang lokal nga industriya sa baboyan.
Kasagaran kanila wala mahibalo kon unsaon nila pagtratar ang balita sa ASF ngadto sa mga miyembro sa lokal nga media. Isulti o itug-an ba nila kini o ilang itago?
Tungod niini, angayan lang nga hisgotan kini og maayo sa mga LGUs aron dunay dali ug epektibo nga pamaagi sa pagsagubang sa problema kon moabot gyod ang panahon nga mosugmat kini.
•••
Sa mga tig-sakay sa mga fastcraft, dunay pangutana.
Unsa kadali ang mga pasahero nga angay makagawas gikan sa mga fastcraft kon dunay emergency?
Sa dihang ako kining gipangutana sa taga Coast Guard, misulti sila nga ang taga Maritime Industry Authority (MARINA) ang angayan motubag niini.
Nganong nangutana man ako niini?
Tungod kay akong nakita nga dugay kaayo makagawas ang mga pasahero kon makadunggo na ang fastcraft sa pantalan.