UNSAY imong panahom sa kahimtang sa kahusay ug kalinaw sa dakbayan sa Sugbo? Delikado ba o dili? Mahadlok ka ba molakaw labi na kon gabii? Apan ngano kon magkalawom ang gabii, magkaalegre ang dakbayan. Daghang manuroy sa nagkalainlaing estabilisemento sa kalingawan.
Nakapangutana kita niini tungod sa bag-ong giluwatan nga database website nga Numbeo nga miubos ngadto sa ika-66 gikan sa ika-55 nga pwesto sa labing luwas nga puy-an nga dakbayan sa Asya. Nag-unang gibasihan sa Numbeo mao ang pagsaka sa index crime sa dakbayan.
Niadtong 2019, sumala sa Numbeo, ang dakbayan sa Sugbo naa sa ika-9 nga pwesto sa Safest Cities in Southeast Asia. Niubos ang Cebu City’s Safety Index Rate tungod sa pagsaka sa iyang Crime Index Rate og 5.29 points. Gikan sa 46.13 sa 2019, nisaka kini ngado sa 51.42 sa 2020.
Apan si Police Colonel Engelbert Soriano, direktor sa Cebu City Police Office (CCPO), niingon nga luwas gihapon nga puy-an ang dakbayan bisan kaniadto pa. Labing ulahing gibasehan ni Soriano mao ang malampuson ug malinawon nga pagpahigayon sa Sinulog 2020. Wa siya makasabot sa gibasehan sa online survey firm.
Ug dihay panahon nga sunodsunod ang patay sa Sugbo apan, nasayod ka ba nga hilom nga gikalipay kini sa uban? Ang sagad gipatay mao ang nalambigit sa negosyo sa gidiling drugas, ug mga adik (inila o yanong tawo). Dili ba ang mga ngilngig nga krimen nahimo sa tawong naulipon sa gidiling drugas?
Tinuod nga nitaas ang index sa krimen apan mitaas usab ang kompiyansa sa mga tawo nga molakaw human nakibhangan ang mga dautang elemento. Sa Numbeo, mius-os ang kaluwasan sa pagpuyo sa Sugbo apan alang sa mga Sugbuanon, ang dakbayan sa Sugbo malinawon ug nagpabiling paraiso ning bag-ong panahon. Ampingan nato kini.