NAKADAWAT og mga pagkaon ug mga container sa tubig ang 800 ka mga residente sa Brgy. Caohagan ug Caubian sa isla sa Olango, Dakbayan sa Lapu-Lapu, sa usa ka non-government organization (NGO) niadtong Sabado, Enero 25.
Ang hinabang gikan sa Pilipinong May Puso Foundation Inc. nga iya ni Rowena Kristina Amara “Wen” Velasco, asawa ni Kongresista Lord Velasco sa Marinduque.
Ang foundation namugna pahinungod ni Nanay Soledad Roa Duterte, inahan ni Presidente Rodrigo Duterte.
Katuyoan sa foundation ang pagtabang sa mga nanginahanglan pinaagi sa suporta sa pribadong indibidwal nga adunay mga malumong kasingkasing.
Si Kongresista Paz Radaza maoy nangunay pagpang apod-apod sa hinabang ngadto sa mga taga isla uban ang mga konsehales sa dakbayan nga sila si Rico Amores, Rex Mangubat, Gregorio Paquibot, Joe Dungog, Junrey Gestopa ug Eddie Cuizon.
Gipakapinan pa kini sa kongresista og mga candy ug duwaan alang sa kabataan.
Mapasalamaton si Radaza nga napili nga matagaan sa PMPF Inc. ang duha ka mga barangay sa isla sa Olango.
“Mapasalamaton sab kaayo ko og dako ni Wen Velasco ug sa tibuok PMPF nga gihatagan ta nila og grasya nga ato gyu’ng napaabot og deretso diha kaninyo,” matod ni Radaza sa iyang pakigpulong sa mga nakadawat.
Niadtong miaging semana, nakadawat na usab sa ilang sweldo ang 2,000 ka mga nakapahimus sa Tulong Pang Hanapbuhay sa Ating Disadvantaged/Displaced (Tupad) program sa Department of Labor and Employment (DOLE) Dole ug buhatan sa kongresista. (GCM)