UNOM ka mga adlaw nga selebrasyon giandam sa local government unit (LGU) sa Lungsod sa Consolacion alang sa ilang ika-100 ka tuig nga kasumaran pagka lungsod kun centennial sa Pebrero 6.
Kini ang gipahibawo ni Consolacion Mayor Joannes “Joyjoy” Alegado sa mga tigbalita niadtong Lunes, Enero 27.
Matod ni Alegado sugdan ang unom ka adlaw nga pagsaulog sa ilang centennial sa Pebrero 1 diin usa ka opening parade ang ipahigayon.
Tapuson kini sa Pebrero 6 pinaagi sa engrandeng Sarok Festival diin 10 ka mga contingent ang magtigi sa Christian/rural based ug free interpretation category.
Langkoban ang kompetisyon sa lima ka mga contingent sa elementary ug lima usab sa high school.
Ang unang ganti P100,000; P75,000 sa 2nd place; P50,000 sa 3rd; P40,000 sa 4th ug P30,000 sa 5th place.
Sa di pa ang showdown usa ka street dancing nga molatas og dul-an sa duha ka mga kilometro ang ipahigayon sa pipila ka kadalanan sa lungsod.
Gumikan kay holiday man sa lungsod nianang adlawa, napanglantawan ni Alegado nga magdasok ang mga tawo nga mosaksi sa kalihukan.
Hinungdan nga di usab kalikayan nga grabe ang masinating traffic nianang adlawa.
Busa karon pa lang, gipahibawo na daan sa mayor ang mga motorista nga likayan ang national highway sa lungsod sa alas 2 sa hapon ngadto sa alas 8 sa gabii.
Gibutyag ni Alegado nga nianang mga orasa, gamiton ang usa ka lane sa lungsod sa street dancing samtang ang usa ka lane maoy alang sa mga motorista.
Ang kapulisan sa lungsod nipadayag na usab sa ilang kaandam sa kalihukan, diin moabot sa dul-an 500 ka mga personnel ug force multiplier ang ilang ipakatap aron masiguro ang kahapsay ug kalinaw sa tibuok kasaulogan.
Aron paglikay usab sa hulga sa 2019 novel coronavirus 2019-nCoV mas maayong magdala na lang usab ug mga hand sanitizer ang mga mosaksi sa kalihukan hilabi nga dili kalikayan nga adunay mga langyaw nga turista nga mosaksi sa kalihukan.
Gibana-banang gigahinan sa lungsod ang ilang centennial celebration ug P20 Million.
“We are asking the public that if you plan to go to the city or go home to the north you traverse Consolacion at around 7pm kay wala nq hipos na na everyone sa parade naa na sa camp and buntag mao say okay agian kay 2pm pa ang close,” matod ni Alegado.
Gawas sa Sarok Festival, ang mga kalihukan sa Centennial celebration sa lungsod naglakip sa sarok waving contest, centenial ball ug fashion show diin tagaan og cash incentive nga P30,000 ang upat ka mga centenarian sa lungsod sa Pebrero 2.
Zarzuela, drama ug play sa Pebrero 3, visual art exhibit ug Mr. and Ms. Centenial sa Pebrero 4 ug battle of the band sa Pebrero 5. (GCM)