GISUGDAN na sa Cebu City Police Office (CCPO) ang imbestigasyon para mailhan kon si kinsa ang nagtawag didto sa Department of Education (DepEd)-Cebu City ug mihulga nga adunay bomba nga pabuthon sa mga eskuwelahan niadtong buntag sa Lunes, Enero 27, 2020.
Kini ang gibutyag ni Mayor Edgardo Labella kinsa nakigtambayayong ni Police Colonel Englebert Soriano, pangulo sa CCPO, para masilotan ang naghimo sa maong binuang nga gikakurat sa mga DepEd officials. Hinuon wala lang kini gipahibawo ni Labella sa publiko.
“I did not tell you yesterday that there was a constant contact with Col. Soriano, the Chief of Police, and he was on top of the situation,” matod ni Labella.
“ Whether it was a hoax or it was s joke or not but we took it seriously and I directed the COP to really monitor and I am also monitoring the situation to be sure that nothing will really happen,” dugang sa mayor.
Ang amahan sa dakbayan sa Sugbo nagkanayon nga gumikan sa maong hulga, ang mga tinugyanan sa balaod nga ubos sa CCPO apil na ang mga bomb sniffing dog, subsub nga nisuhid sa mga eskuwelahan nga ginganlan sa caller apan negatibo ang resulta.
Si Labella nagkanayon nga wala niya gipahibawo sa publiko ang maong hitabo aron usab dili ma-panic ang mga tinun-an, ginikanan ug magtutudlo. (PAC)