TANANG serbisyo nga anaa sa Talisay City hall ang mamahimo unya nga ma-avail diha sa 22 ka barangay sa dakbayan sa Talisay.
Kini human nga ang programa nga Aksyon Agad, ang mamahimo na unya nga ‘Aksyon Agad sa Barangay’.
Ubos niini, ang tanang serbisyo, gikan sa dental, medical services, veterinary services, renewal ug pag-apply og mga permit o uban pang transakyon diha sa accounting office ang dad-on sa kabarangayan.
Lakip na niini ang sa City Social Welfare Services, late registration pinaagi sa City registrar ug uban pang mga serbisyo nga makuha sa Talisay City hall ang ma-avail na sa mga Talisaynon diha mismo sa ilang barangay.
Gitug-an mismo ni Talisay City Mayor Gerald Anthony Gullas nga sugdan kini karong Enero 31 diha sa Lawaan 3.
Himuon ang Aksyon Agad sa Barangay usa ngadto sa duha ka semana depende sa kon unsa kadaghan ang populasyon o gidak-on dapit.
“We find it helpful sa Talisaynon, nga dad-on ngadto sa 22 ka mga barangays start nato this month ang Aksyon Agad sa barangay. Meaning at least once a year we will bring all city hall services to the barangays,” saysay ni Gullas. (FMD)