LABING minos 10 ka mga samad dinunggaban ang napalgan sa medico legal officer sa kapulisan sa lawas sa asawa nga gidungggab una gisunog uban sa ilang balay sa Barangay Liboron, Dakbayan sa Carcar niadtong Dominggo sa buntag, Enero 25, 2020.
Apan giklaro ni Dr. Bejamin Lara sa PNP Crime Laboratory nga ni-autopsy sa nasunog nga lawas ni Dailyn Melecio, 24, nga hayan mas daghan pa ang mga samad nga nahiaguman niini, apan di na masuta sa paghiling kay napaig na ang lawas.
Napalgan ni Lara nga si Melecio dunay pito ka mga samad sa baga ug tulo sa atay.
Nunot sa kamatayon ni Dailyn, si Police Staff Sgt. Regie Amad sa Carcar City Police Station niingon nga gipasakaan na og kasong parricide ang bana nga si Romnick Melecio, kinsa nabilanggo sa Carcar Police Station.
Nagtuo ang Carcar City Police nga gibuhat sa bana ang pagsunog sa balay nga naa ang asawa aron matabonan ug di mahibaw-an ang pagpatay kang Dailyn.
Apan dunay mga silingan nga nakadungog sa panag-aw sa magtiayon nianang buntag pa sa maong adlaw tungod sa selos. Ang ilang lima ka buwang masuso naluwas sa mga silingan gikan sa balay nga nagdilaab.
Samtang si Abigail Bogay, pangu sa City Social Welfare and Services (CSWS) sa dakbayan sa Carcar nga nahinabi sa Superbalita Cebu, niingon nga ila nang na-turn over sa lola nga inahan ni Dailyn ang masuso.
Matod ni Bogay nga ang kapulisan ug ang mga sakop sa CSWS maoy nag-asister ug misuta sa mga papel nga dala sa lola nga nagpamatuod nga inahan siya ni Dailyn, usa ini ang birth certificate.
“Yes amo nang giturn-over sa lola, sa Maternal side sa bata,” pahibawo ni Bogay sa Superbalita Cebu.
Dugang ni Bogay nga nakita nila nga angay usab ipailawom sa counceling ang inahan ni Dailyn nga si Rodelia Alac-ac tungod sa trauma human nga nahiba-aw ang nadangatan sa anak.
“Usa sa among nakita nga gikaproblemahan gyud sa inahan sa namatay kon unsaon niini pagdala pauli sa iyang lawas didto sa ilang lugar sa Negros. Mao to nga among gipasabot ug gipailawom usab sa counselling,” dugang ni Bogay.
GIbiyahe na kagahapong adlawa paingon sa lungsod sa Mabinay sa probinsiya sa Negros Oriental ang lawas ni Dailyn.
Uban sa ilang inahan mao ang mga igsuon ni Dailyn.
Di makapasaylo
Si Rodelia nga nahinabi sa Superbalita Cebu nibutyag nga di niya masabot ang iyang gibati human siya mahibawo sa pagkapatay sa iyang anak.
Mismo ang bana pa sa iyang anak maoy naghimo sa linuog nga krimen.
Dugang ni Nanay Rodelia sa pagkakaron, di niya mapasaylo ang ang iyang umagad.
“Maayo pa iyang gipalayas, Sir, kon nagselos man gali siya. Karon sa iyang gibuhat niya sa akong anak, mabalik pa ba niya ang kinabuhi sa akong anak?,” matod ni Rodelia sa Superbalita Cebu. (BBT)