ANG pagkutlo sa iyang ikalimang sunod-sunod nga kadaugan mao’y target ni Philippine prospect ug undefeated Bryan James Wild sa dihang iyang ikasangka si Margarito Moya sa main event 6-round fight karong Pebrero 8, 2020 sa Barangay Apas Sports Center, Dakbayan sa Sugbo.
Kini mao’y ikalimang professional fight sa 18-anyos nga Wild kinsa aduna’y 4-0 nga baraha, tulo niini iyang gipang-knockout.
Sa iyang uwahing away, girehistro ni Wild ang impresibong kadaugan pinaagi sa pag-knockout ni Melanio Torremocha sulod sa pipila lang ka segundos sa first round didto sa Enan Chiong Activity Center sa City of Naga, Cebu niadtong Disyembre 21, sa niaging tuig.
Batok kang Moya sa Lapu-lapu City, si Wild gituohan nga makasugat og malisod nga tahas sanglit ang 24-anyos nga Moya aduna’y hataas og eksperiyensiya batok kaniya.
Apan sa iyang uwahing mga away, si Moya nakaangkon og walo ka sunod-sunod nga kapildihan, rason nga nakapahagsa sa iyang professional record, 9-10, tulo ka knockouts.
Giulohan og Fight Night in Apas, laing six-round fight ang magsilbing co-main event sa maong card nga ubos as Wild Boxing Promotion.
Ang pambato sa Gerry Pens Stable ni Gerry Penalosa ga si Pitt Laurente makigsinukliay sa iyag mga kinumo batok sa laing beterano nga si Romnick Magos sa 6-round match.
Sama kang Wild, ang 20 anyos nga Laurente, lumad nga taga General Santos City apan atoa na magbasehan sa Kaulohan, wala pa’y pildi sa upat ka professional fights nga gidayandayanan usab og tulo ka knockouts.
Si Magos, sa iyang bahin, aduna na usay 23 ka away, 12 ka daog nga may pito ka knockout apan 11 usab ang pildi niini.
Ang gituohan nga laing mokawat sa atensiyon sa kagabhion mao ang panagtigi sa supporting bouts nga langkuban sa upat ka panagsangka ubos sa four-round fight.
Si Maurino Agum sa Big Yellow Stable, makigbatok kang Rolien Getalada; Russu Laurente sa Gerry Pens Stable batok Anthony Tunacao sa Phil-Aust, Christopher Cabruog (Big Yellow) batok Joshua Unabia (Compostela), Kenneth Delapena (Gerry Pens) batok Jimpol Dignos (Phil-Aust).
Subay niini, gipahibawo ni Jossel Wild nga mapalit na ang ticket sa maong away sa ubos nga presyo.
Ang VIP seats mokantidad og P200 samtang P50 lang ang gold seats. Aduna’y lingkoranan alang sa tag P25 apan limitado lang kini.
Ang mga tiket mapalit sa Barangay Apas office ug mahimong mokontak ni Jossel Wild sa 09206051601. (JBM)