DUL-AN 10,000 ka mga tawag ang nadawat sa City Risk Reduction Management Department (CDRRMD) sulod sa tuig 2019 sa Hotline 911 diin ubay-ubay niini ang mga prank class.
Gibutyag sa CDRRMD nga ang 98,916 nga mga tawag sa emerhensya naglakip sa hang-up/non-sense nga tawag diin 12 usab niini ang prank calls.
Duna na usab mga numero nga gi-block ang CDRRMD.
Gibutyag ni Nick Jabagat, tsirman sa CDRRMD, nga dili binuangan ang emergency hotline tungod kay sa panahon nga duna nay emerhensiya nga tinuod, dili na kini marespondehan.
Gipasabot ni Jabagat nga imbes nga magamit ang mga rescue team sa pagresponde sa uban nga tinuod nga nagkinahanglan og tabang, didto nakapaingon sa nagbinuang lang gumikan tungod kay dili man nila baliwalaon ang mga tawag.
"Mao nang atong kanunay nga pahimangno sa atong mga kaigsoonan dili unta nila binuangan ang atong emergency hotline kay maabot ang panahon nga naa silay tinuod nga emergency dili na hinuon sila makasulod," matud ni Jabagat.
Nasayran nga ang sistema niini dunay kapasidad nga mo-block sa numero nga nagbinuang og tawag ug mabalik lang kini kung mobisita sa buhatan sa CDRRMD ug pamatud-an nga wala nagbinuang.
Giingong gakadawat sila og mga tawag nga nag-ingon nga dunay sunog, bangga ug uban pa apan pag-abot sa dapit, wala kini kamatuoran.
"Yes, every now and then, naa pa gihapon gapanawag dinhi, telling us nga naay fire alarm, naay bangga unsa pa diha and siyempre dili namo na pwedi i-disregard. Atong awhag nga seryusohon gamiton lang sa insaktong nga pamaagi, sa insakto nga sitwasiyon," pahimangno niini.
Ang tawag kalabot sa fire anaa sa 381; law enforcement, 4,597; medical emergency, 1,982; rescue, 1,544 ug other calls 11,418.