NALATAYAN sa ligid ang ulo sa usa ka driver sa motorsiklo nga maoy hinungdan sa kamatayon niini kagahapon sa buntag, Enero 28, 2020, sa Barangay Danao, lungsod sa Jasaan, Misamis Oriental.
Patay si Wilson M. Balasabas, 35, lumad sa Langcagan, Poblacion, Mahinog, probinsya sa Camiguin, ug nagmaneho sa Yamaha sniper 150 nga motorsiklo nagdala sa temporaryo nga plaka.
Sa inisyal nga imbestigasyon sa Jasaan Police Station, nasuta nga ang motorsiklo nga gimaneho ni Balasabas padulong sa Gingoog.
Giingong sunod kini sila sa usa ka Fuso wing van rebuilt truck, color pula nagdala sa plaka ACN 9713 nga gimaneho ni Ritchel C. Magpale, 42, taga Barangay 14, Gingoog City.
Apan giingong kalit lang mi-overtake ang motorsiklo ug nawad-an sa kontrol ang driver, hinungdan sa pagkahulog niini ug maoy rason nalatayan kini sa wingvan.
Nagrabehan pag-ayo ang ulo niini sa biktima kinsa gidali pa og dala sa Jasaan Community Hospital apan gideklarar kining dead on arrival sa mga doktor.
Ang driver sa wing van didto na boluntaryong mitahan sa Balingasag Municipal Police Station kinsa gitakdang mag-atubang og kasong reckless imprudence resulting in homicide.