LUWAS na ang bag-ong gipanganak nga bata sulod sa pansayan ug gilabay sa basurahan sa CdeO 2 Cycles, Zayas, Carmen mga alas 7:00 sa gabii niadtong adlawng Lunes, Enero 27, sa siyudad sa Cagayan de Oro.
Gibanabanang anaa sa 7.8 pounds nga batang lalaki ang nakita diin padayong gi-atiman karon sa balay tambalanan.
Sa pakighinabi sa Superbalita Cagayan de Oro kang Police Major Jelesis Teves, hepe sa Police Station 4 (PS4) sa Carmen, gibutyag nga nakita sa manager sa maong patigayon ang maong bata.
Giingong nakurat sila gumikan na usab kay nagkadugo na ang pansayan sa mga babaye ug nadiskobrehan ang bag-ong panganak nga bata diha sa basurahan.
"Ang nakakita kay si Mario Dacoseo, manager sa CdO 2 Cycles. Okay na ang baby," matud ni Teves.
Karong panahona, gisuta pa ang kuha sa closed circuit television camera ilabi na giingong dunay pinakaulahing nakita nga misulod sa pansayan nga usa ka batan-on nga babaye kinsa giingong naka-uniporme.
"Amo na nga gi-request ang kuha sa CCTV para makita namo," dugang niini.