NAG-UNA ang online libel sa mga napasaka nga kaso diha sa buhatan sa Anti-Cybercrime sa regional office.
Giingong gisundan kini sa online threat o pagpanghulga diha sa social media ug online scam o mga pagpangilad nga naglambigit og kantidad.
Gibutyag ni Police Major Vincent Magto, chief sa FBTS-CFCU, nga kini ang top 3 nga gipasakang kaso diin pinakadaghan gyud ang online libel.
Gidugang pa niini nga kini gumikan na usab kay dunay tawo nga mapahungaw sa ilang kasuko pinaagi sa social media nga unta dili angay nga buhaton.
"Naa man go'y ubang tao na didto nila mapahungaw ilang kasuko sa tao not knowing nga dili siya ang proper venue we encourage them to report to the appropriate authority," matud ni Magto.
Gidugang pa niini nga ang uban nibutyag nga aron usab sa kasayoran sa tanan apan dili gihapon kini maayo nga magpataka og post labi na kung pwedi pa kini masulbad sama sa away sa pamilya ug uban pa.
"Awareness daw sa iba, awareness siya if in fact, kung tinuod ang gipang-istorya when it comes to libelous nga paghimohimo na og istorya, that's already a violation of the rights of other people," dugang pa.
Giingong ang online libel mao ang mga istorya nga paghimo-himo aron dauton ang usa ka tawo.