DAKPAN ang usa ka lolo kinsa wanted sa kasong pagpanglugos sa probinsya sa Camiguin human kini nagtago-tago.
Ang dinakpan mao si Florentino B. Guibone, 67, minyo, lumad sa Camiguin, apan nagtago-tago sa Barangay Anakan, Gingoog City, Misamis Oriental.
Ang operasyon gipangunahan ni Police Lieutenant Colonel Ariel Philipp Pontillas, hepe sa Gingoog City Police Station, 1st Platoon, 1001st MC, RMFB-Northern Mindanao, nga gipangunahan ni Police Lieutenant Srailland A. Dela Vega ug 2nd Platoon 1st PMFC Misamis Oriental sa pagpanguna ni Police Captain James Ralph E. Naval ug Camiguin Provincial Police Office sa pagpanguna ni Police Captain Arnold T. Gaabucayan.
Gisilbi sa kapolisan ang warrant of arrest batok kang Guibone sa kasong rape nga giisyu ni Judge Rustico D. Paderanga sa Regional Trial Court-10, Branch 28, Mambajao niadto pang Hulyo 12, 2013 ug walay piyansa nga girekomendar.
Si Guibone gikonsiderang number 7 nga most wanted sa probinsya sa Camiguin ug sa pagkasikop niini gitakda kining dalahon balik sa maong lalawigan.
Gidayeg sab ni Police Colonel Robert Roy Bahian ang kapolisan sa koordinasyon nga gihimo ug usa kini ka paagi sa ilang Simultaneous Aggressive Police Operation, LOI Manhunt Charlie ug Enhanced Operational Concept of the Managing Police Operations.