ALAS tres sa hapon sa adlawng Dominggo. Sulod sa Luyang Beach Club nagkapundok ang mga opisyal ug mga aktibong membro sa Amiraw National High School Alumni Association Batch 1976. Gihisgutan nila ang umaabot nga grand reunion nga gitakda sa bulan sa Disyembre ning tuiga. Kuwarinta ka tawo ang nanambong, pulos mga senior citizen na. Ekslusibo ang maong miting. Way gipaapil nga mga kapikas sa membro o opisyal.
Mitindog ang ilang presidente. si Dr. Frank Garces. Siya ang tag-iya sa resort nga gigamit, isip iyang tampo sa kalihukan. Way bayad. Misenyas siya nga pahinayan ang ‘sound’. Unya gitawag niya ang atensiyon sa tanang nanambong.
“Gusto nako nga friends ta tanan. Way mga kahiubos ug dautang pagbati sa usag usa. Sa kuwarinta ka tuig nga nanglabay mangutana ko kon wa bay nagkauyab sa mga alumni. Ang nagkadayon, maayo. Pero kadtong nagkabuwag sa di maayong kabubut-on, magpanisayloay na lang. We have to remain the best of friends!” matod ni Dr. Garces.
Gipawong na lang gyud una ang videoke. Pero nagsige ang inom. Ang mga babaye light beer ang gipanginom. Ang mga lalake mas isog nga mga ilimnon ang gipanginom.
Sa nabati nilang mga pulong ni Dr. Garces, nagkatinan-away sila si Elmer, 65 anyos, ug si Verna, 62 anyos. Manag-uyab sila kanhi, apan human sa gradwasyon wa na sila magkita. Karon pa sila nagkakita pag-usab. Si Elmer may lima na ka anak ug walo na iyang mga apo. Dili niya ikasinabot ang iyang asawa. Si Verna may duha ka anak ug tulo ka apo.
“Kinsay mouna og sulti?” awhag ni Dr. Garces nga mipasarap sa iyang panan-aw sa tanan.
Miisa sa kamot si Elmer. Habig sa iyang tuo, sa gilay-ong usa ka dupa, diha ang lamesa ni Verna ug lima niya ka kaubang mga babaye.
“Sige, Elmer, sulti na!” dasig ni Dr. Garces.
Mitindog si Elmer. “Seryuso ko sa among relasyon. Mangasawa gyud unta ko kang Verna, apan nawala man siya. Ako siyang giadto sa iyang gitrabahoan. Duna siyay ka-estoryang lalake. Sweet kaayo sila. Wa na lang ko mopadayon og duol kaniya. Gusto lang unta kog ‘closure.’
“Kon gusto ka pag ‘closure’, mao na unta to ang higayon. Imo untang giduol si Verna ug nagpaila ka sa lalake nga uyab ka ni Verna,” sagbat ni Maricor nga diha sa wala ni Verna. Nanglad-ok sa iyang laway si Elmer.
“Unsay imong ikasulti, Vern?” ni Dr. Garces. “Unsa pa mang matanga sa ‘closure’ iyang gusto? Tiguwang na mi. Nangapo na. Automatic closure na na, bisan wa mi pormal nga panagbuwag. Sa ato pa, uyab pa diay mi hangtod karon?” ni Verna.
“Oo. Kay magpa-anular man ko sa akong kasal sa ako karong asawa. Inig kahuman kita na poy pakasal,” ni Elmer nga mitutok kang Verna. Nangatawa ang kadaghanan.
“Akong bana abogado. Makatabang siya sa pagpa-anular sa imong kasal. Ipalibre pa tikag attorney’s fees. Pero unsaon man nimo pagpangasawa nako, nga wa pa man ko mabiyuda?” ni Verna.
Miduko si Elmer. “Gusto lang kog ‘closure’,” matod niya nga naminghoy.
“Nakasabot na ko sa imong giingong ‘closure.’ Ako ray uyab nimo nga wa nimo matilawi. May gipaangkan ka sa Danao, sa Compostela ug sa Catmon. Kon gusto ka motilaw nako, tsek-in tag short time. Daghan mang kuwarto sa resort. Di na ko momabdos kay nag-menupos na man ko,” ni Verna.
Naniga ang mga mata sa kadaghanan. Nanglipaghong si Elmer. Pilit lang gihapon ang iyang tinan-awan kang Verna. Kaganihang buntag nagsige siyag dayeg kang Verna nga wa gyud kuno mausab. Guwapa ug batan-on kuno gihapong tan-awon.
“Hangyo lang ko. ‘Hug’ lang,” ni Elmer nga nagpapinguypingoy.
“Kana ra diay?” Mitindog dayon si Verna ug miduol sa lamesa ni Elmer.
Mitindog si Elmer ug gigakos og hugot si Verna. Nasingo niya ang kahumot sa kanhi uyab. Halos dili makaginhawa si Verna sa kahugot sa paggakos ni Elmer kaniya. Wa na lang siya moreklamo. Unya kusog nga namakpak ang mga saksi. (Katapusan)