SI SPORTS Development Division Chief of the City Mayor’s Office of Davao (SDD-CMO) officer-in-charge Michael Aportadera naglaum sa mas malampuson ug mabungahong tuig alang sa mga atleta sa siyudad nga motigi sa local, regional, national ug international sports karong 2020.
Si Aportadera, niadtong Enero 24 sa Davao Convention Center, mitambong sa consultative meeting nga gitambungan sa 77 ka coaches ug opisyales nga nagrepresenta sa 39 ka isports sa siyudad.
Sa iyang mensahe, si Aportadera midayeg sa mga coach sa kalampusan sa mga atleta sa dakbayan sa nakalabay nga tuig, diin nabitbit niini ang overall championship sa Batang Pinoy Mindanao qualifying uban ang 50 ka gold medals, 40 ka silvers ug 56 ka bronse.
Apil sab dinhi ang impresibo nga kampanya nila sa Philippine National Games ug Arafura Games sa Darwin City, Australia diin sila mibitbit pauli og 17 ka golds, 28 silvers ug 16 ka bronse.
Ang Davao mao say third overall sa Batang Pinoy National Games sa Palawan niadtong Agosto 2019, nga mihakot og 31 golds, 30 silvers ug 41 bronze; third overall sa National Philspada Para Games sa Bulacan, uban ang 21 golds, 21 silvers ug 13 bronze.
Pipila sab ka atleta gikan Davao ang kabahin sa overall championship sa 30th SEA Games diin mitampo og bulawan sila Nesthy Petecio (women’s boxing), Jezebel Morcillo (women’s arnis), Chino Tancontian (men’s sambo), Mark Anthony Alcoseba (men’s soft tennis) ug Nathaniel Sanchez and Kymille Rodriguez (mixed team obstacle course); silver medalists Jenilou Mosqueda (women’s kurash), Mark Alexander Lim (men’s jiu jitsu), Agot Danton (women’s rugby football); Mummar Alamara ug Abnel Tawasil (men’s water polo) ug Francis Phillip Saura (men’s volleyball) ug bronze winners Jackielou Escarpe ug Carl Dave Aseneta (men’s team judo), Dave Aseneta (men’s individual judo), Sonny Wagdos (men’s 5,000-meter run), ug Sydney Tancontian (women’s kurash).
Ang consultative meeting tumong nga maresolba ang mga isyu nga sagad sagubangon sa mga grupo o organisasyon sa isports.
Ni Aportadera, “A leader is one who knows the way, he goes the way and shows the way. Your action inspire others to dream more, learn more, do more and become more.”
Si SDD-CMO Program Director Cindy A. Cruz, sa iyang bahin nagdasig sab sa mga coaches nga i-fill-up og maayo ang porma tungod ang ilang opisina nagpatuman sa mas istrikto nga sistema.
“All request, endorsements and documents in hosting and participating a sport events for the Araw ng Dabaw, Kadayawan, Batang Pinoy, National and international Sports must be done on time,” ni Cruz.