ANG helicopter nga gisakyan ni Kobe Bryant suma pa walay ‘recommended warning system’ nga moalerto sa piloto kung kini siya hapit na motugpa.
Apan di pa sab matino kung kini ang rason sa pagkahagsa sa sakayan diin sakay ang siyam ka tawo, diin gilantaw nga ang piloto nawad-an og kontrol ug miugbok kini sa bukirong bahin, sigun sa federal investigators, Martes.
Si Pilot Ara Zobayan misubida sa mga panganod dihang kalit kining mipaubos sa 1,200-foot (366-meter) sud sa pipila ka minuto.
“This is a pretty steep descent at high speed,” suma ni Jennifer Homendy sa National Transportation Safety Board.
“We know that this was a high-energy impact crash,” dugang niya.
Dugang pa halos tibuok pa sa helicopter apan ang impact o kakusog sa pagkahagsa niini miresulta sa pagkatag-katag sa debris, sobra 500 feet (150 meters).
Nakuha na sab ang nabiling patay’ng lawas, Martes, diin ang lawas nila Bryant, Zobayan ug laing duha ka pasahero nailhan na pinaagi sa fingerprints.
Suma pa ang pagdetermina sa rason sa pagkahagsa molanat pa’g pila ka bulan, apan mga imbestigador nagrekomenda aron malikayan ang sama niini nga insidente, mga helicopter nga magsakay og sobra unom ka pasahero angay may Terrain Awareness and Warning System nga mo-alarma kung ang sakayan anaa sa risgo sa pagkahagsa. (AP)