SUMALA sa report sa Transparency International, nahimutang sa ika-113 nga puwesto sa 180 ka mga nasud nga corrupt ang Pilipinas sa 2019, miubos og 14 puntos sa kanhi nahimutangan nga ika-99 niadtong 2018.
Sa pagsabot sa uban misaka ang kurapsyon sa nasud ubos sa pagdumala ni Presidente Rodrigo Duterte kay gikan sa 99 misaka ang ihap sa 113. Ang pag-ila sa ang-ang sa rank sa nasud nga pinakakurap maingon nga mao ang nag-una o numero uno. Kung top 10 ang ginahisgutan nga gipresenta pananglitan sa eskuwelahan ang pinakahawod mao ang number one, samtang ang ikanapulo mao ang kinaiwitan o tumoy nga hapit na mawagtang sa hanay.
Ubay-ubay na sa mga empleyado sa gobyerno ang gitangtang ni President Digong sa ilang trabaho tungod sa pagkalambigit sa kurapsyon tungod usa kini sa iyang gisaad niadtong panahon sa iyang pagpangampanya nga iyang wagtangon.
Ang kurapsyon makita ug mahitabo sa mga nagkadaiyang ahensya sa kagamhanan panahon nga dunay mga kalihokan nga nalambigit ang kuwarta. Apil sa mga ahensya sa gobyerno nga giingon nga kurap mao ang Bureau of Custom (BoC), Bureau of Internal Revenue (BIR), Department of Public Works and Highways (DPWH), Department of Health (DoH) ug uban pa.
Pipila sa atong higala naapil sa gitaktak gikan sa ilang nahimutangan nga mga ahensya tungod sa isyu sa kurapsyon ug daghan pa ang padayon nga ginapanid-an aron dunay makuha nga pruweba.
Daghan ang gipangsumbong apan gipaagi sa insakto nga proseso kay si President Digong nasayod nga dili molampos ang kaso kung walay insakto nga ebidensiya.
Usa ka artikulo o opinyon nga gisulat ni Pnous Mourdoukoutas niadtong Enero 24 nga gipatik sa usa ka nasyonal nga pamantalaan nga nagbatikos kang President Duterte nga nagpalambo kuno sa kurapsyon sa gobyerno nga maoy nahimong hinungdan nga wala molambo ang atong nasud.
Wala kuno makapatukod og moderno nga mga imprastraktura ang kagamhanan, napakyas sa pagdani sa mga langyaw nga kapitalista sa pagbuhos sa ilang puhonan sa negosyo dinhi sa atong nasud.
Alang sa kadaghanan, usa sa hinungdan sa ilang paghatag og taas nga pagsalig kang President Digong sa katapusang kuwarter sa 2019 mao ang kampanya aron pagtaktak sa serbisyo sa mga trabahante nga kurap.
Daghan ang nagtuo nga naubsan ang kurapsyon mao nga daghan ang mga proyekto nga ginatukod sa tibuok nasud dili sama sa kanhing administrasyon nga ang kalambuan ug mga proyekto didto lang sa Luzon ug tipik lang alang sa Visayas ug Mindanao.
Apan luyo niining mga kalambuan dili ta makadungog ug makabasa sa maayo nga komento ug opinyon gikan sa pundok sa katawhan nga gisakitan kay wa nagdahom nga usa nga gikan sa probinsya ang molutos kanila ug magtul-id sa hiwi nila nga binuhatan.