PATAY ang usa ka pulis samtang laing tulo ang samdan ug usa ka opisyal ang luwas nga nakuha gikan sa lugar human sila gi-ambush niadtong Miyerkules sa buntag, Enero 29, sa Barangay Tikalaan, Talakag, Bukidnon giingong hinimoan sa New People’s Army (NPA).
Ang mga pulis sakay sa tulo ka sakyanang nagkombuya nagsakay si Police Brigadier General Joselito Salido, ang deputy chief of the Directorate for Integrated Police Operation in Eastern Mindanao samtang padulong nga mo-inspeksiyon sa dihang wala mailhing armadong grupo nagpaarak sa ilang gisakyan.
Gisulti ni Police Regional Office (PRO) Davao spokesperson Major Eudisan Gultiano nga wala pay kompirmasyon kon mga rebeldeng komunista ang nagpaluyo sa atake.
Ang on the spot nga napatay mao si Police Corporal Ro Sumaylo.
Human sa insidente, matud ni Gultiano nga si PRO Davao regional director Police Brigadier General Filmore Escobal nagmando sa mga yunit sa pulis nga duol sa lugar nga mag-alerto ilabi na sa Baguio District duol sa Bukidnon. (Juliet C. Revita)