UPAT ka dagkong kompaniya sa bus sa nasud nagpadayag sa ilang interes nga mohanyag alang sa P18.6 bilyon nga transport modernization project sa dakbayan nga gitawag og High Priority Bus System (HPBS).
Gikanayon ni HPBS spokesperson Norman Baloro niadtong Miyerkules, Enero 29, nga base sa ilang impormasyon, dunay upat ka mga dakong lokal ug bisan kompaniya gikan sa Manila kinsa mosalmot sa “bidding” gitakda sa Pebrero.
Wa hinuon niya gibutyag ang mga pangalan sa maong mga kompaniya apan iyang giklaro nga ang gidaghanon mahimong motaas pa tungod kay dugang kompaniya nagpadala og suwat sa dakbayan alang sa ilang intensiyon sab sa paghanyag.
Sa Pebrero, dugang ni Baloro nga ang ilang idetermina ang kompaniya kinsa modaug sa hanyag. Gipaspasan na sa gobyerno ang proseso subay sa direktiba ni Mayor Sara Duterte-Carpio.
Dunay mga 1,000 ka bus ang gilauman nga magdagan sa mga kadalanan sa siyudad aron nga ihulip sa mga 7,000 nga public utility jeepneys (PUJ). Ang badyet sa maong proyekto magagikan sa Asian Development Bank (ADB). Ang dakbayan nag-alokar sab og P250 milyon nga badyet alang sa tabang nga ihatag ngadto sa mga naapektuhan sa indibiduwal.
Base sa datus gikan sa Land Transportation Franchising and Regulatory Board (LTFRB) Davao, dunay mga 6,600 PUJ operators sa siyudad kinsa nanag-iya og 7,000 yunit. Kon ang usa ka yunit dunay duha ka drayber, dunay kapin sa 20,000 ka drayber ug operators kinsa maapektuhan sa maong proyekto.
Sa Oktubre, nilaum si Baloro nga dunay 160 bus mosugod sa pagbiyahe sa mga prayoridad nga lugar nga naglakip sa Toril nga 100 ka buss (66 ka mga bus stops), Catalunan Grande uban sa 50 ka bus (54 ka bus stops), ug Diversion Road nga dunay 10 ka bus (48 bus stops). Ubang mga lugar mosunod pa.
Sa kasamtangan, gitug-an ni Baloro nga dunay kinatibuk-ang 234 ka drayber kinsa nagtinguha nga mo-aplay alang sa tabang pinansiyal ug “non-financial assistance”. (Juliet C. Revita)