NAGHINUKTOK sa tumang kaguol ang usa ka mister nga gibiyaan sa asawa gumikan nasakpan nga wa siyay gisul-ob nga brief nga miuli sa ilang balay didto sa lungsod sa Nabunturan, Davao de Oro sayo sa kaadlawon niadtong Lunes.
Ang mister nga wa magpabutyag sa matuod niya nga pangalan, tawgon lang natong Onsot, 25, ug way permamenteng trabaho.
Sumala pa nga nagpatabang si Onsot sa suod niyang higala nga si alyas Goryo aron pangitaon ang nawala niining asawa human nga milakaw gikan sa ilang balay.
Subay sa saysay ni alyas Goryo nga nahinabi sa Superbalita nga nagkuyog sila ni Onsot nga naabtan og kaadlawon una nakauli sa tagsa-tagsa nila ka mga balay sanglit nalingaw sila nga nagtagay og ilimnong makahubog sulod sa bar sa siyudad sa Tagum.
Nasayran nga ang higala ni Onsot dako og daug sa swertres niadtong higayona human niigo ang mga numero nga gihatag kaniya sa usa ka programa sa radyo.
Human sa tagay, gibutyag ni alyas Goryo nga nagpamasahe sila ni Onsot sa ubos nga bahin sa bar nga ilang giimnan sanglit nadani kuno sila sa mga seksi nga mga masahista nga maoy namugos aron sila magpamasahe.
Nagtuo si Goryo nga human sa masahe, nalimot si Onsot pagsul-ob sa iyang brief ug nabilin sulod sa lawak diin sila rang duha sa masahista.
Wa na masayud matud pa ni Onsot kon asa nawala ang iyang brief tungod sa kahubog.
Matud pa nga sa dihang niuli si Onsot sa ilang balay, maoy misugat ang grabeng yawyaw sa asawa nga naglanog-lanog tungod kay mingaw pa niadtong tungura kay kaadlawon.
Dugang ni Goryo nga iyang nadungog ang masuk-anong pangutana sa asawa ngadto kang Onsot kung asa na ang brief niini ug kung nganong wa na masul-ob niini sa pag-uli.
Apan ang iyang higala, matud pa, wa makatubag sa asawa.
Pasawop na ang adlaw dihang nahuwasan sa kahubog si Onsot ug nahigmata nga wala na sa sulod sa balay ang asawa ug wala na sab ang mga sinina niini, apil na ang usa ka tuig nilang anak.
Adlaw’ng Martes, sayo sa buntag uban sa higala nga si alyas Goryo, giapas nila ang milayas nga asawa sa balay sa ginikanan niini didto sa Mati City, Davao Oriental.
Apan wala matud pa ang iyang asawa didto ug wa sab kuno masayud ang iyang ginikanan sanglit wa silay kasayuran sa hitabo. Wa sab siya ngadto sa mga suod nilang higala.
Gisulayan sab og kontak pinaagi sa selpon ang asawa apan dili na makontak.
Sa kaguol nga gibati ug naghinuktok nga nagpaabot og masakyan sulod sa terminal sa Mati, misaad si Onsot nga kung mahibalik lang sa iyang kiliran ang milayas niyang asawa, dili na niya kini pasuk-on inay panggaon pag-ayo.
Magbag-o na sab siya sa iyang pagka-adik sa swertres ug pagkapalahubog ug mangita’g tarong nga trabaho aron mabuhi ang iyang asawa ug anak.
Sa pagsuwat ning balita, mag-higala padung sa General Santos City sa pagtuo nga ang iyang asawa tua sa balay sa usa sa mga igsuon niini nitapon.