TAAL, Batangas - Nadawat na ang P6 milyones nga tabang pinansyal sa Ormoc City alang sa mga biktima sa pagbuto sa bulkang Taal.
Si Ormoc City Mayor Richard Gomez ug Kogresista Lucy Torres - Gomez uban ni Vice Mayor Toto Locsin Jr, Konsehal Lalaine Marcos ug Goito Yrastorza ug City Administrator Vince Emnas ningtunol sa tseke.
Ang P6 milyones gibahin sa duha ka lugar. Ang P3 milyones sa lungsod sa Taal samtang laing P3 milyones sa Tagaytay City.
Kapin sa tulo ka oras ang gibiyahe sa magtiayong Gomez ug kaubanan sa paghatud sa tabang.
Una nga gitunol ang P3 milyones sa Tagaytay City diin mismo si Mayor Agnes ug bana nga si Kongresista Abraham Tolentino ningdawat niini.
Matod ni Mayor Tolentino nga dako kaayo og tabang ang gihatag sa Ormoc para sa pag recover gikan sa insidente.
Matod ni Kong. Tolentino, nagplano usab sila nga mahimong sister city ang Ormoc.
Sunod nga gibiyahe sa magtiayon nga Gomez ug kaubanan ang lungsod sa Taal.
Gisugat ni Mayor Fulgencio Mercado ug mga opisyal ang grupo ni Gomez dala ang P3 milyones.