WA MOLUGAK ang kapulisan sa siyudad sa Talisay sa pagtutok sa operasyon sa Barangay Tanke human laing 14 na usab ka mga gitudlo nga durugista ang nangasikop atol sa anti-drug operation niadtong Miyerkules sa buntag, Enero 29.
Nagsugod kini pasado alas 4 sa kaadlawon hangtud na sa alas 6:45 sa buntag diin moabot sa 21.14 grams ug mokabat sa 143, 752 ang balor sa mga nasakmit nga ilegal nga drugas.
Kini tinabangan na usab sa gipatuman nga 24/7 static checkpoint nga gihimo sa Tanke ug sa barangay San Roque, kabahin gihapon sa ilang programa nga Oplan Limpyo Talisay alang sa hingpit na nga pagpuhag sa mga ilegal sa Talisay, ilabi na drugas.
Ang mga nasikop sila Walter Cabardo, Richard Dela Cruz, Roger Bacus ug laing 11 ka mga kaubanan pa niini sa Sitio Salvador, Sambagan ug San Rafael, ug Sawsawan sa Tanke.
Ang tulo ang giila nga mga high value individual sa ilang barangay.
Matud ni Police Major Gerard Ace Pelare, hepe sa Talisay City Police, nga tungod sa way hunong nga anti-drug operation ug 24/7 nga checkpoint sa Tangke ug San Roque, na-locked down na nila ang drug personalities ug ma-neutralize na ang lugar.
Hinungdan nga gipangandaman usab nila ang posibleng pagbalhin sa hagbong ug kuhaanan og drugas sa ubang barangay sama sa Cansojong ug Tabunok.
Samtang, nadawat sa Talisay City Police Station ang usa ka resolusyon gikan sa Hunta Probinsyal nga nag-commend o gidayeg ang nabuhat ang kapulisan sa Talisay sa nahimo nila nga buy bust niadtong’ Enero 11, diin nakasakmit sila og kapin sa P5 milyones nga balor sa drugas.
Ang resolusyon ang giduso ug gi-aprubahan niadtong Enero 20 atol sa ilang session nga gipangamahan ni Provincial board member Raul Bacaltos ug bokal Yolanda Daan.
“The successful Anti-drug operations clearly demonstrates the determination of the Police Officers of Talisay City Police Station to combat the proliferation of illegal drugs in the City in line with the current thrust of the government eradicating the same, hence, deserving of commendation by the 15th Sangguniang Panlalawigan of Cebu to serve as inspiration to other law enforcers in their Battle Against Illegal Drugs,” tipik sa resolusyon.
Nadawat nila sa TCPS ang kopya sa resolusyon, Miyerkules sa buntag, Enero 29.
Mapasalamaton sila sa TCPS nga giila ang ilang serbisyo ug ang walay hunong nga mga operasyon ug kampanya batok sa drugas.
Ang lokal nga kagamhanan sa Talisay nahagit sa kanunay nga pagsulti ni Presidente Rodrigo Duterte nga wa masulbad ang pagkuyanap sa ilegal nga druga sa dakbayan ug gitumbok pa sa presidente ang Barangay Tanke. (FMD)