SUBAY niining hulga sa 2019 novel coronavirus sa Wuhan, China, gipahibawo sa Chinese Consulate General sa Sugbo, Consul General Jia Li, nga gipahunong una sa Chinese Government ang tanang group tours pagawas sa ilang nasod.
Samtang giklaro usab ni Li nga dili kinahanglan nga mang-ban og Chinese nationals hilabi na nga way kompirmado nga kaso sa Sugbo, subay na usab kini sa mga pamahayag nila ni Cebu City Mayor Edgardo Labella ug Lapu-Lapu City Mayor Junard Chan nga i-ban ang pagsulod sa Chinese nationals sa Sugbo.
Si Li niklaro nga wa siyay nakita nga rason nga i-ban ang pagsulod sa Chinese nationals sa Sugbo karon nga gi-lock down na sa China ang Wuhan ingon man aduna’y partial lockdowns ang pipila ka bahin sa China ug way kompirmado nga kaso sa Sugbo.
Sa uwahing update sa Chinese consul general, Miyerkules, Enero 29 sa alas 10 sa buntag, niabot na sa 5,999 ka mga pasyente ang kompirmado nga aduna’y 2019-nCoV ug niabot na sa 132 ang patay.
Nagsugod
Enero 27 dihang gipahunong na sa Chinese government ang mga biyahe o group tours gawas sa ilang nasod sa mga Chinese tourists aron malikayan ang pagkuyanap sa virus.
Apan Enero 25 pa lang, wa nay Chinese tourists nga naabot sa Sugbo.
Matod ni Li nga bisan kon way refund nga nadawat ang mga Chinese nationals nga ni-book sa ilang tours aron mobisita unta sa Sugbo, apan tungod kay prayoridad ang panglawas, wa nay nahimo ang mga Chinese, motuman sa gobyerno ug di na mobiyahe.
Nitambag usab si Li kang Labella ug Chan nga sa di pa mopatuman og ban sa Chinese nationals, mokonsulta usa kini sa Department of Health (DOH) ug tun-an pag-ayo.
Niadtong 2018, niabot sa 630,000 ka Chinese tourists ang nibisita sa Sugbo samtang niabot sa 700,000 ang Chinese tourist visits sa Sugbo niadtong 2019.
Tungod usab sa outbreak, ma-postpone kining tulo unta ka mga bag-ong direct flights gikan China paingon sa Sugbo.
Kasamtangan nga adunay 36 ka direct flights ang Sugbo ug China matag semana.
Tungod usab sa Chinese New Year, di pa makabutyag ang Chinese consul sa Cebu kon mikunhod ang ilang visa applications tungod kay sirado sila niadtong Enero 24-30 ug mobalik sila karong Enero 30, Huwebes.
Nagpasalamat
Subay sa dinaliang aksyon sa gobyerno hilabi na sa DOH 7 kabahin sa kaso sa 5-anyos nga batang lalake nga suspek sa 2019-nCoV, mapasalamaton usab si Li ug ang pamilya sa bata sa gihimo sa awtoridad ingon man sa dinalian nga aksyon niini.
Sa pagkakaron way taho nga nadawat ang consul kabahin sa diskriminasyon sa kahadlok sa publiko ngadto sa mga Chinese tourist.
Matod ni Li nga maayo ang mga Sugbuanon sa pagtratar nila sa mga langyaw ingon man di lang unta mahadlok tungod kay bisan ang mga turista wa nag-mask tungod kay himsog kini nga nisulod sa nasod.
Way mikanselar
“Business as usual” sa hotel and resorts lakip na ang travel and tour agencies sa Lapu-Lapu City nga nanawat og booking sa mga Chinese tourist, taliwala sa kabalaka sa 2019-nCoV.
“So far wa pa may cancellation sa ilang (Chinese tourist) bookings,” matod ni Ed Mendez, tourism officer sa Lapu-Lapu City sa dihang nahinabi sa Superbalita Cebu.
Nipahibawo sab ang tigpamaba sa GMR-Megawide Cebu Airport Corp. (GMCAC), Avigael Maningo-Ratcliffe, nga nagpadayon ang flights sa tugpahanan sa Mactan niadtong airlines nga adunay direct flight sa nagkadaiyang dapit sa nasud sa China.
Ang matag tourism establishment sa Lapu-Lapu gimanduan sa kagamhanan sa Dakbayan pinaagi sa Office of the Mayor nga moumol og kaugalingong “Incident Command Plan” ilabi na niining pagbuto sa gikabalak-an nga coronavirus.
Ang Lapu-Lapu adunay di mominus 190 ka mga hotel and resorts.
Nipasabot si Mendez sa maong paagi nahibawo nang daan ang management sa mga angay buhaton sa higayon nga makasugat og guest nga nakasinati og simtomas nga nataptan o bisan suspected 2019-nCoV.
Giklaro sa opisyal nga negatibo ang dakbayan sa maong virus sigun sa pakig-alayon ngadto sa City Health Office.
Base sa records sa tourism office nga karong panahona maoy tingdagsa sa Chinese tourists sa dayong tapos sa kasaulogan sa Chinese New Year lahos na ngadto sa summer season, mga mobakasyon dili lang sa Sugbo lakip na ngadto sa ubang dapit dinhi sa nasud.
Sumala pa ni Mendez nga lakip nilang gi-monitor kadtong mga Chinese nationals nga nanarbaho sa dakbayan ilabi na sa usa ka township development sa Mactan diin nahimutang sa condominiums ug international BPO company nga adunay ubay-ubay nga Chinese nationals. (HBL & FVQ)