NAMATAY diha-diha ang giila nga high value individual (HVI) sa lungsod sa Minglanilla human giingong nisukol sa mga sakop sa Minglanilla Police atol sa buy-bust operation sa alas 3 sa Miyerkules sa hapon, Enero 29, 2020.
Ang suspek mao si Jigger Lawas, 39, taga sitio KSKC, Barangay Tungkop, lungsod sa Minglanilla.
Matod ni Police Major William Homoc, hepe sa Minglanilla Police Station ug maoy nangu sa buy-bust, nga sa dihang namatikdan ni Lawas nga pulis ang gikatransaksyon, una kining namusil.
Gi-hostage pa ang usa sa mga menor de edad nga babaye nga anaa sa sud sa balay aron unta makaikyas.
Lima ka mga babayeng menor ang na-rescue ug laing duha ka mga lalake nga gidudahan nga kauban niini sa ilegal nga patigayon nasikop sa kapulisan. Dugang ni Homoc nga ang na-rescue ug nadakpan nag-pot session.
Nakuha sa crime scene ang 9mm nga armas ni Lawas. (BBT, FMD)