DAW naibtan og tunok sa dughan ang kanhi magduduwa sa Philippine Basketball Association (PBA) nga si Eliud “Eloy” Poligrates human nabasura sa korte ang kaso nga Republic Act 9262 o Violence Against Women and Children Act nga gipasaka sa iyang kanhi uyab batok kaniya.
Niadtong Enero 13, 2020, si Lucille Allosada Trazona mipasaka ning maong kaso batok kang Poligrates, 33, sa pasangil nga gidagmalan siya niini human sa ilang panaglalis sa parking lot sa usa ka convenience store sa Barangay Sta. Cruz, Cebu City.
Si Poligrates, kinsa lumad nga taga Bagacawa, Poro, Camotes, gidakop sa kapulisan niadtong Enero 14, 2020 ug nabalhog kini sa bilangguan sa Abellana Police Station.
Paglabay sa tulo ka mga adlaw, gipagawas ra sa kapulisan ang produkto sa Southwestern University (SWU)-Phinma Cobras human nasuta nga wala’y igong basihan ang pasangil batok niini.
Unya kagahapon lang, mismong si Trazona mipirma og affidavit sa law office ni Atty. Zeus R. Mabanag sa Mandaue City diin iyang gibutyag nga wala’y kamatuoran nga gidagmalan siya ni Poligrates ug wala siya’y bun-og.
Gipasabot ni Trazona nga naglalis lang sila ni Poligrates niadtong higayuna.
“That I further attest that during the incident described above, we only had verbal argument and that there was no physical altercation between me and Eliud G. Poligrates and that I incurred no physical injuries in relation to the incident,” tipik sa affidavit nga gipirmahan ni Trazona.
Nagkanayon si Poligrates nga dako ang iyang kalipay nga nabutyag ra ang kamatuoran gumikan kay mao kini ang agianan nga makaduwa siya’g balik sa PBA D-League sa Manila diin siya ang nahimong MVP sa miaging Foundation Cup ubos sa kampo nga Marinerong Pilipino Skippers.
Gipasabot ni Poligrates nga dihang nakagawas na siya sa bilangguan, miduol siya sa Marinerong Pilipino aron moduwa’g balik sa team apan wala siya dawata sa management gumikan kay dili kini gusto nga mamansahan og bati nga imahe.
Asoy ni Poligrates nga gipangayuan siya sa Marinerong Pilipino og kamatuoran nga nabasura na ang iyang kaso ug wala’y kamatuoran ang pasangil batok kaniya.
”Nalipay gyud ko’g dako kay nipirma siya (Trazona) og affidavit nga na-dismiss na ang kaso ug dili tinuod ang pasangil niya. Mura ko’g naibtan og tunok kay lisod kaayo ning wala ta’y trabaho,” matod ni Poligrates.
Si Poligrates manuglarga na’g balik sa Manila aron moapil na’g sugod sa praktis sa Marinerong Pilipino nga hugot nang nangandam alang sa sunod komperensya sa D-League nga magsugod karong Pebrero 12.
Nabantog si Poligrates dihang nakamugna kini og 67 puntos sa usa lang ka duwa niadtong Agusto 26 diin gipangmakmak sa Marinerong Pilipino ang iWalk Chargers, 141-97.
Ang 67 puntos ni Poligrates maoy bag-ong rekord sa D-League. (ESL)