MIHANAP ang poruhan ang Cebu-Casino Ethyl Alcohol Sharks human sila nasugamak sa kapildihan batok sa Pampanga Giant Lanterns, 88-77, niadtong Martes sa gabii, Enero 28, 2020, sa Maharlika Pilipinas Basketball League (MPBL) Lakan Season sa Cuneta Astrodome sa Pasay City.
Sa kapildihan, ang Sharks natagak sa 13-14 nga rekord, ikasiyam sa South Division sunod sa Bicol-LCC Stores nga naa sa ikawalong dapit dala ang 15-13 nga rekord.
Ang mopatigbabaw nga walo sa South Division ug hasta sa North Division mao lang ang makaabante sa playoffs.
Sa ilang sitwasyon sa kasamtangan, kinahanglang haruson pagdaog sa Sharks ang katapusan nilang tulo ka mga tahas ug mag-ampo nga mapilde ang Bicol sa katapusan niining duha ka mga duwa aron makaseguro pagsulod sa playoffs.
Sa ilang bahin, ang Giant Lanterns ningsaka sa 19-9 nga rekord diin gikatabla nila ang Bataan alang sa ikaupat ug ikalimang mga puwesto sa North Division.
Ang Giant Lanterns ningmugna og 14-5 run aron inaton ang ilang gamay ra unta nga labaw ngadto sa 84-70 sa nahabiling 1:50 minutos nga maoy nagtiklop sa paglaom sa Sharks.
Puntos matag usa:
Pampanga (88) - Hernandez 21, Juico 15, Maiquez 14, Apreku 7, Muyang 6, Fabian 6, Thompson 4, Alberto 4, Cruz 3, Gomez 3.
Cebu-Casino Ethyl Alcohol (77) - McAloney 17, Octobre 14, Lee Yu 10, Nuñez 9, Ubalde 8, Galvez 7, Coronel 5, Mantilla 3, Viloria 2, Cortes 2. (JNP, ESL)