24 pts., 8 rebounds ni Embiid para ni Bryant

NAGPAKATAP si Joel Embiid og 24 puntos ug walo ka rebounds – mga numero sa jersey nga gigamit ni anhing Kobe Bryant – aron agakon ang hosts Philadelphia 76ers ngadto sa kadaugan batok sa Golden State Warriors, 115-104, kagahapon sa National Basketball Association (NBA).

Kining duwaa gipahinungod sa 76ers ngadto kang Bryant, ang nipanaw nga superstar sa Los Angeles Lakers nga natawo sa Philadelphia, Pennsylvania.

Dihang napasulod ni Embiid ang iyang ika-24 nga puntos sa sayong bahin sa 4th quarter, nakasinggit ang 7-footer nga magduduwa og “Kobe!” ug wala na kini nidugang pagmugna og puntos.

Ning sangkaa, gipadaplin una ni Embiid ang No.21 sa iyang jersey aron gamiton ang No. 24 ni Bryant.

Dili na unta puwedeng gamiton sa bisan kinsang magduduwa sa Phidelphia ang No. 24 gumikan kay giretiro na kini sa team agi’g pahinungod sa ilang kanhi defensive star nga si Hall of Famer Bobby Jones, sakop sa 1983 NBA champion.

Gitawagan ni Embiid si Jones aron mananghid nga iyang gamiton ang No. 24 sa usa lang ka duwa aron ipahinungod niya kang Bryant.

“I told Joel to play hard defense because that is what the No. 24 represents in my mind. I thanked him for the call, and I’m glad he and I had the chance to talk,” pamahayag ni Jones.

Mao pa lang kini ang pagbalik og duwa ni Embiid gikan sa pagkaangol sa iyang kamot hinungdan nga nagpanikad kini hilabi na kay iyang gipahinungod ngadto kang Bryant ang iyang pagduwa.

Sulod sab sa siyam ka mga duwa nga wala nakapakita og aksyon si Embiid ug ning maong higayuna, ang 76ers nakatali og 6-3 nga rekord.

Usa pa lang ka teenager si Embiid sa Africa dihang nagsugod kini’g duwa sa baslketball ug nagsunod sa mga duwa ni Bryant. Nadasig si Embiid sa makapaukyab nga estilo ni Bryant kaniadto hinungdan nga nakadesisyon kining mobiya sa volleyball aron magtutok sa basketball. (AP, ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph