NATUMBOK na sa medical examiners kagahapon ang patay’ng lawas ni basketball legend Kobe Bryant human makuha ang mga siyam ka mga tawo nga nangakabsan sa kinabuhi gumikan sa helicopter crash sa Calabasas, California ning bag-uhay lang.
Opisyal nga giila sa medical examiners ang patay’ng lawas sa Los Angeles Lakers superstar ug sa laing tulo pinaagi sa pagkuha og fingerprints, duha ka mga adlaw gikan sa insidente.
Ang mga imbestigador nakahuman na sa ilang inspeksyon sa crash site ug ilaha na kining gipadangat sa mga awtoridad.
“We are done on the site,” matod ni Jennifer Homendy, usa ka miyembro sa National Transportation Safety Board.
Gipamunit sa mga imbestigador ang nagkadaiyang mga parti sa helicopter nga nangagusbat ug nagkatag sa lugar sa insidente dayon ilaha kining giusa.
Migamit sab og drone ang mga imbestigador aron subayon ang giagian sa helicopter.
Ang tanang patay’ng mga lawas sa mga biktima gipadala na sa forensic science center aron susihon.
Gawas kang Bryant, opisyal na sab nga naila ang lawas sa pilot nga si Ara Zobayan, baseball coach John Altobelli ug Sarah Chester.
Wala pa opisyal nga naila ang lawas sa laing lima ka mga biktima nga naglakip sa anak ni Bryant nga si Gianna. (AP, ESL)